Ubuyobozi bw’ikipe ya Rayon Sports imaze iminsi itabona intsinzi, bwashimiye abakunzi bayo, bituma bamwe babwerurira ko bashaka ko bwegura vuba na bwangu kuko babushinja kuganisha ahabi ikipe yabo.
Ubutumwa bwatambutse kuri Twitter ya Rayon Sports kuri uyu wa Kabiri tariki 22 Werurwe 2022, bushimira abakunzi ba Rayon Sports, buvuga ko bagomba kuyishyigikira yaba iri “mu bihe byiza no mu bihe bibi.”
Ni ubutumwa butanzwe mu gihe iyi kipe iri mu zifite ibigwi mu Rwanda, imaze iminsi itabona intsinzi by’umwihariko ikaba yaritwaye nabi mu mukino iheruka gukinamo na mucyeba wayo Kiyovu Sports ikayitsinda ibitego 2-0 iyirusha mu buryo bwagarariraga buri wese.
Bamwe mu bakunzi b’iyi kipe ivugwaho kuba ari yo ifite abafana benshi mu Rwanda, bahise bagaragaza amarangamutima yabo ko batishimiye umusaruro w’iyi kipe.
Uwitwa Joseph Alain yagize ati “Aba barashaka kuzana akandi kavuyo maze kubabona, Ikipe ko yabananiye mwayamanitse mukareka kudutesha igihe.”
Hashakimana Nasson we yagize ati “Turababonye ntimutubonye.”
Rymond Kayihura we yatanze igitekerezo avuga ko Rayon Sports imaze iminsi iragwamo ibibazo, ati “dukeneye ikipe yacu uko yari imeze kuva kera. Nyakubahwa H E Kagame dutabare pe Rayon yacu igiye gusenyuka pe fideli out [Fidel yegure]”
Uwitwa Niyibizi Gentil wagaragaje ko agikomeje kubabazwa n’intsinzwi y’umukino uherutse guhuza Rayon na Kiyovu, yavuze ati “Ese match yararngiye gute Admin ko mutashyizeho results? Match iracyaba hagati yanyu Rayon na Kiyovu??? Muduhe results na n’ubu sindazimenya pe Njyewe?”
- Advertisement -
Nanone Raymond Kayihura yunzemo agira ati “Jean Fideli wakweguye ko Rayon atari umudugudu ngo urabanza kumara manda yawe.”
Benshi mu batanze ibitekerezo kuri ubu butumwa, bagaragazaga akababaro batewe no kuba ikipe yabo iri kwitwara nabi mu gihe hari abandi bacye bavugaga ko kabone nubwo yaba iri kunyura mu bihe bibi ariko ntakizababuza gukomeza kuyikunda.
UMUSEKE.RW