Ubuyobozi bwa REG VC bwatangaje ko Kwizera Pierre Marshal ari we mutoza mushya w’iyi kipe mu myaka ibiri imbere.
Kuri uyu wa Mbere, nibwo biciye ku mbuga nkoranyambaga z’ikipe ya REG Volleyball Club, ubuyobozi bwayo bwatangaje umutoza mushya w’iyi kipe mu myaka ibiri imbere.
Kwizera Marshal wahoze ari umukinnyi ukomeye mu mukino wa Volleyball, ni we wasinyiye REG VC amasezerano y’imyaka ibiri nk’umutoza mukuru.
Si mushya muri Volleyball y’u Rwanda, yatoje amakipe arimo Kirehe VC, Gisagara VC avuyemo n’iyi REG VC yatoje hagati ya 2018 na 2019 agarutsemo ku nshuro ya Kabiri.
Uyu mutoza yasabwe guha iyi kipe igikombe cya shampiyona n’ibindi bikombe by’amarushanwa akinirwa imbere mu Gihugu.
Mu mpera za 2015, Kwizera yatangaje ko yahagaritse gukina umukino wa Volleyball kubera imvune yari yagize yo mu kaboko ariko nyuma aza kujya gutoza Kirehe VC mbere gato y’uko yaguzwe na Gisagara VC nk’umukinnyi.
Yakiniye amakipe arimo INATEK VC, APR VC yatwayemo shampiyona eshanu n’izindi.
Kuva muri 2006 yakiniye ikipe y’Igihugu yegukana ibikombe bitandukanye birimo n’ibya Zone V. Kwizera yakinnye amarushanwa y’amakipe yabaye aya Mbere ku mugabane wa Afurika.
Muri 2017, Kwizera Pierre Marshal ni bwo yatangaje ko asezeye mu ikipe y’Igihugu ya Volleyball.
- Advertisement -
HABIMANA SADI/UMUSEKE.RW