Imikino y’abamugaye: Huye yegukanye igikombe cya shampiyona ya Amputee Football

Mu mikino y’abamugaye ya Amputee Football yasorejwe mu Akarere ka Musanze kuri iki Cyumweru, ikipe yari ihagarariye Akarere ka Huye ni yo yegukanye igikombe cya shampiyona.

Ni shampiyona yakinwe mu byiciro bine kuva tariki 23 Ukwakira 2021, ikinirwa mu Turere dutandukanye.

Kuri iki Cyumweru hakinwe imikino icumi hagati y’amakipe atanu yagiye ahura hagati ya yo kugira ngo habarwe ikipe ifite amanita menshi kurusha izindi, abe ari yo yegukana igikombe cya shampiyona.

Ikipe yari ihagarariye Akarere ka Huye, ni yo yegukanye igikombe cya shampiyona n’amanota 35 nyuma yo gutsinda umukino umwe, igatsindwa undi, ikanganya undi. Ikipe yari ihagarariye Akarere ka Musanze yegukanye umwanya wa Kabiri n’amanota 34 nyuma yo gutsinda imikino ibiri ikananganya indi ibiri.

Uretse guhabwa igikombe, ikipe ya Mbere yahawe amafaranga agiherekeza angana n‘ibihumbi 100 Frw, iya Kabiri ihabwa ibihumbi 60 Frw, mu gihe iya Gatatu yahembwe ibihumbi 40 Frw.

Uko imikino yose yagenze mu isozwa rya shampiyona:

1. Huye 4-1 Nyamasheke
2. Musanze 0-0 Nyarugenge
3. Rubavu 4-2 Nyamasheke
4. Nyarugenge 4-1 Huye
5. Musanze 2-1 Rubavu
6. Musanze 2-0 Nyamasheke
7. Huye 2-1 Rubavu
8. Nyarugenge 1-1 Nyamasheke
9. Rubavu 2-2 Nyarugenge
10. Huye 1-1 Musanze

Uko amakipe atanu ya mbere yasojwe umwaka w’imikino akurikiranye:

1. Huye: Amanota 35
2. Musanze: Amanota 34
3. Rubavu: Amanota 22
4. Nyarugenge: Amanota 17
5. Nyamasheke: Amanota 2

HABIMANA SADI/UMUSEKE.RW