Insanganyamatsiko ikunzwe kuvugwaho n’abahanzi batandukanye ahanini ni urukundo hagati y’umukobwa n’umuhungu, kuva ku gusaba ubucuti, guhana amasezerano, gutandukana n’ibindi.
Radjab Shyirambere Kevin [ Famous Gets ] Umuraperi ukomoka i Nyamirambo mu Mujyi wa Kigali yashyize hanze indirimbo nshya ivuga ku rukundo rwo kwimara ipfa.
Ni indirimbo yise iminota 30 yasohotse kuri uyu wa 05 Gicurasi 2022 irimo amagambo azimije yibanda ku rukundo ruganisha mu gitanda.
Yumvikanamo inkuru y’umusore ufite urukumbuzi rw’umukunzi we wifuza ko bamarana iminota 30 bakimara ipfa.
Ati “Inyanja irimo imiraba ngashya impande zose ubwato bwanjye ntiburohama mu mivu n’imihengeri.”
Ku mbuga nkoranyambaga ntivugwaho rumwe. Iyi nganzo y’imitoma hari abavuga ko iganisha kwinezeza mu buriri abandi bakabifata nk’amasomo akenewe mu muryango.
Famous Gets yabwiye UMUSEKE ko nta kidasanzwe muri iriya ndirimbo ikomeje kwishimirwa na benshi ku muyoboro wa Youtube.
Ati “Hari n’ibindi bikorwa nzashyira hanze mu minsi mike iri imbere gusa. Icyo nabwira umufana cyangwa undi muntu wese ukunda ibihangano byanjye ni uko iyi ari imirabyo bari kubona inkuba ziri inyuma.”
Famous Gets uri mu bahanzwe amaso mu muziki nyarwanda, by’umwihariko mu njyana ya Hip Hop avuga ko aje gusiba icyuho cy’abaraperi bakomoka i Nyamirambo bashinjwe kenshi gukoresha ibiyobyabwenge.
Ati “Urumva ndashaka guca impaka zo kumva ko i Nyamirambo abaraperi baho bishwe n’itabi, bariya barashaje ubu haje umuraperi uhetse Nyamirambo atari biriya mwumvaga.”
- Advertisement -
Ubusanzwe ni umuririmbyi, umwanditsi w’indirimbo, umusizi akaba n’umuraperi. Aherutse gushyira hanze indirimbo yise ’40’ ikubiyemo ubutumwa bwo kunenga abantu baciraho abandi iteka.
Mu buryo bw’amajwi “30Mins” yakozwe na Producer Odilo amashusho atunganywa na Sammy Switch.
Reba amashusho y’indirimbo Iminota 30 ya Famous Gets
NDEKEZI JOHNSON / UMUSEKE.RW