Mu mikino ya Volleyball ikinwa n’abamugaye [Sitting Volleyball] yasorezwaga mu Akarere ka Rubavu, ikipe yari ihagarariye Akarere ka Bugesera mu bagore n’iyari ihagarariye Akarere ka Gisagara mu bagabo, ni zo zegukanye ibikombe bya shampiyona.
Ku Cyumweru tariki 8 Gicurasi, ni bwo mu Akarere ka Rubavu hakiniwe imikino yo gusoza shampiyona ya Volleyball ikinwa n’abamugaye [Sitting Volleyball] mu bagabo n’abagore.
Iyi shampiyona yari yatangiye tariki 28-29 Ugushyingo umwaka ushize, ubwo yasozwaga yari yahujwe n’irushanwa ryo Kwibuka Abatutsi bazize Jenoside muri Mata 1994. Iyi shampiyona yitabiriwe n’amakipe 19 n’amakipe icumi mu bagabo.
Mu gusoza shampiyona, mu bagabo hakinwe imikino 12, mu gihe mu bagore hakinwe umukino umwe gusa.
Nyuma y’iyi mikino, ikipe ya Gisagara Sitting Volleyball Club mu bagabo, ni yo yegukanye igikombe cya shampiyona itsinze Gasabo Sitting Volleyball Club amaseti abiri kuri imwe. [16-25, 25-23, 15-13].
Mu bagore, Bugesera Sitting Volleyball Club yisubije iki gikombe itsinze Gicumbi Sitting Volleyball Club amaseti abiri ku busa [25-19, 25-21]. Iyi kipe yisubije igikombe yegukanye kuva mu 2017 kugeza magingo aya.
Ikipe ya Mbere muri buri cyiciro [abagabo n’abagore], yahawe igikombe , imidari, inahembwa ibihumbi 150 Frw bigiherekeza. Iya Kabiri yahawe imidari n’ibihumbi 100 Frw, mu gihe iya Gatatu yahembwe imidari n’ibihumbi 80 Frw.
Abakinnyi bitwaye neza, na bo buri umwe yagiye ahembwa.
Abitwaye neza mu bagore:
- Advertisement -
Umurisa Hoziana: Best receiver [Bugesera]
Nyirambarushimana Sandrine: Best attacker [Bugesera]
Umutoni Clèmentine: Best setter [Bugesera]
Mugirwanake Louise: Best blocker [Bugesera]
Kwizera Carine: Best server [Bugesera]
Nyirambarushimana Sandrine: MVP [Bugesera]
Abitwaye neza mu bagabo:
Mataratara: Best libero [Gisagara]
Iraguha: Best blocker [Gisagara]
Murema Jean Baptiste: Best setter [Gasabo]
Iraguha: Best server [Gisagara]
Ngizwenimana Bosco: Best attacker, MVP [Gisagara]
HABIMANA SADI/UMUSEKE.RW