Ni irushanwa ryasojwe ku Cyumweru tariki 19 Kamena, risorezwa mu Iseminari Nto yo ku Karubanda, ishuri riherereye mu Akarere ka Huye [Petit Seminaire Virgo Fidèlis]. Iri rushanwa ryo Kwibuka Alphonse Rutsindura wari umwarimu n’umutoza mu mukino wa Volleyball muri Petit Seminaire Virgo Fidelis, ni ryo rushanwa rikinwa n’amakipe menshi mu Rwanda.
Memorial Rutsindura, ni irushanwa ngarukamwaka ritegurwa ku bufatanye na Petit Seminaire Virgo Fidelis n’ihuriro ry’Abize muri iri shuri [ASEVIF] rifatwa nk’igicumbi cya Volleyball mu Rwanda.
Ikipe ya Gisagara Volleyball Club na UVC VC ni yo yegukanye ibikombe mu cyiciro cy’ababigizi umwuga (Serie A), ari na cyo cyiciro usagangamo abagore, mu gihe mu bindi byiciro ari abagabo.
Mu cyiciro cya Kabiri cyiganjemo amakipe y’amashuri yisumbuye na za kaminuza, ikipe ya Christ Roi ni yo yegukanye igikombe itsinze Petit Seminaire Virgo Fidelis amaseti 3-2. Mu cyiciro cy’amashuri abanza, igikombe cyegukanywe na Groupe Scolaire Kigeme itsinze École Primaire Mugombwa ku mukino wa nyuma. Mu cyiciro rusange cy’amashuri yisumbuye (O’ level) igikombe cyegukanywe na Groupe scolaire Officiel Butare itsinze Petit Seminaire amaseti 3-0. Naho mu cyiciro cy’abakanyujijeho, ikipe ya Relax ni yo yegukanye igikombe itsinze Umucyo ku mukino wa nyuma.
Ikipe ya Gisagara Volleyball y’umutoza Nyirimana Fidèle, yegukanye iri rushanwa ku maseti 3-2 bikaba inshuro yayo ya mbere kuva itangiye kurikina, kuko ryari ryarihariwe na REG VC aho yari ibitse iki gikombe inshuro 3.
REG Volleyball Club, ntabwo yitwaye neza muri iri rushanwa, kuko yatsindiwe ku mukino wa nyuma, nyamara yari yaritangiye neza.
Uyu mukino wa nyuma, umutoza mukuru wayo, Marshal Kwizera yari yakoze impinduka mu ikipe ye, ugereranyije n’ikipe yatwaranye na yo igikombe cya GMT mu byumweru bibiri bishize, aho yari yagaruye Murangwa Nelson na Sibomana Jean Paul, aba bombi bakanitwara neza n’ubwo bategukanye igikombe.
REG VC yatsinze iseti ya mbere ku manota 25 kuri 21 ya Gisagara VC, iseti ya 2 yegukanywe na Gisagara VC ku manota 25 kuri 15. Iseti ya 3 yaje kwegukanwa nanone na REG VC yari ibaye iya 2 kuri yo, gusa ntiyitwara neza mu iseti ya 4, aho yegukanywe na Gisagara VC, maze banganya amaseti 2 kuri 2, kuko iseti ya nyuma Gisagara yayitsinzwe ku manoata 25 kuri 23.
United Volleyball Club (UVC) yahoze ari UTB yongeye kwegukana igikombe nyuma ya Gisagara Tournament yatwaye mu ntangiriro z’uyu mwaka, yegukanye igikombe itsinze APR VC ku mukino wa nyuma amaseti 3-1 .
- Advertisement -
Rutsindura Alphonse yavutse mu 1958 i Ndora mu Karere ka Gisagara, yiga amashuri yisumbuye muri Seminari nto ya Karubanda, amashuri makuru ayakomereza muri IPN (Institut Pédagogique National) i Butare.
Yabaye umwarimu w’umuziki n’ikilatini mu Iseminari, aba umusifuzi n’umutoza w’ikipe ya Seminari kuva 1983-1994, aba umutoza mukuru w’ikipe y’Igihugu y’abagore mu 1988-1990. Yanabaye Visi Perezida wa Federasiyo ya Volleyball (FRVB), aba n’umutoza wa Rayon Sports VC mu mwaka wa 1990.
Rutsindura uhora agaruka mu mitima y’Abanyarwanda, yishwe muri Jenoside yakorewe Abatutsi mu 1994, yicanwa n’umugore we, Mukarubayiza Verena n’abana be batatu, Iriza Alain, Izere Arsene na Icyeza Alida.
UMUSEKE.RW