Mu gusoza umwaka w’imikino muri Basketball, abakinnyi babiri ba REG Basketball Club na REG Women Basketball Club, Axel Mpoyo na Mireille Nyota Muganza, bahembwe nk’abakinnyi beza b’umwaka muri shampiyona.
Mbere yo gutanga ibi bihembo, habanje umukino wa All Star Game uhuza amakipe abiri y’intoranywa. Amakipe ayobowe na Axel Mpoyo na Hagumintwali Steve wa Patriots BBC, niyo yabanje gukina.
Ikipe ya Axel Mpoyo niyo yegukanye intsinzi nyuma yo gutsinda iya Steve ku manota 126-116.
Hahise hakurikiraho gutsinda amanota atatu no gutera Slam Dunk. Abazarushanyijwe gutsinda amanota atatu barimo Uwitonze Justin (IPRC kigali), Sangwe Armel (APR), Tuyishemeze Dieudonné (IPRC Huye), Ndizeye Ndayisaba Dieudonné (Patriots), Munyeshuri Thierry (Espoir) na Aganze Espoir (UGB).
Nyuma yo kubanza guca mu ijonjora ryagiye rikuramo umwe umwe, Ndizeye Ndayisaba Dieudonné wa Patriots BBC niwe wegukanye igihembo ahigitse abandi bose, maze ahembwa ibihumbi 500 Frw.
Hahise hakurikiraho gutera za Slam Dunk. Abarimo gurushanwa muri iki cyiciro barimo Ndayizeye Samuel (Titans), Ngendahimana Ngabo Rachid (UR Huye), Irakoze Jules, Mbanze Bryan (IPRC Huye), Kammouh Frank (Shoot for the stars), Pierre Steven (APR) na Cleveland Thomas Jr (REG).
Aba nabo bagiye bakora Slam Dunk bagahabwa amanota, kugeza hasigayemo babiri ba nyuma barimo Thomas Cleveland wa REG BBC na Ndayizeye Samuel wa Titans BBC.
Nyuma yo gukora izindi Slam Dunk za nyuma, abatangaga amanota bemeje ko Thomas Cleveland ari we watsinze, ahabwa ibihumbi 500 Frw.
Hakurikiyeho umuhango wo guhemba abitwaye neza muri shampiyona y’umwaka ushize 2021/2022. Aha hahembwe abahungu n’abakobwa.
- Advertisement -
Uko ibihembo byatanzwe mu bakobwa:
Ikipe y’umwaka yabaye: Nelly Nsanzabaganwa [APR], Sandra Kantore [REG], Ines Nezerwa [REG], Betty Kalanga [REG] na Mireille Nyota Muganza [REG]. Umutoza w’umwaka mu bagore, yabaye Mukaneza Ésperance utoza REG WBBC.
Abegukanye ibihembo ku giti cyabo mu bakobwa:
Micomyiza Rosine [The Hoops] yegukanye igihembo cy’uwatsinze amanota atatu kenshi, Mireille Nyota Muganza [REG] yegukanye igihembo cy’uwatsinze amanota menshi, Umugwaneza Charlotte [APR] ahembwa nk’uwugariye neza mu gihe Jane Dusabe [The Hoops] yahembwe nk’umukinnyi wazamuye urwego kurusha abandi.
Mu bakobwa uwabaye umukinnyi mwiza w’umwaka, yabaye Mireille Nyota Muganza wa REG WBBC.
Hahise hakurikiraho guhemba abitwaye neza mu bahungu, habanza gutangazwa uko batanu baje mu ikipe y’umwaka buri umwe yitwaye.
Ikipe y’umwaka mu bahungu: Adonis Filler [REG], Kenneth Gasana [Patriots], Steve Hagumintwali [Patriots], Axel Mpoyo [REG] na Pitchou Manga [REG]. umutoza w’umwaka yabaye Henry Dennis Newton Mwinuka utoza REG BBC.
Ibihembo by’abantu ku giti cyabo nibyo byahise bitangwa.
Munyeshuri Thierry [Espoir] yahembwe nk’uwatsinze amanota menshi kurusha abandi, Frank Betoudji Kamndoh [Shoot For Stars] ahembwa nk’uwugariye neza yongera guhembwa nk’uwatsinze amanota menshi, Turatsinze Olivier [IPRC-Kigali] ahembwa nk’uwazamuye urwego mu gihe Axel Mpoyo [REG] yabaye umukinnyi w’umwaka.
UMUSEKE.RW