Mu mukino wa Kabiri wa kamarampaka, ikipe ya REG Basketball Club yatsinze REG Basketball Club mu mukino witabiriwe n’abatari bake b’uyu mukino.
Kuri uyu wa Gatandatu, ni bwo hakinywe umukino wa Kabiri wa kamarampaka muri shampiyona y’icyiciro cya Mbere ya Basketball [Playoffs].
Ni umukino wahuje ikipe ya REG BBC na Patriots BBC muri BK Arena, aho wari witabiriwe n’abakunzi b’uyu mukino benshi.
Bitewe no kuba Patriots BBC yari yatsinze umukino wa Mbere, ikipe ya REG BBC ntacyo gusiga inyuma yari ifite kuko abakinnyi bayo bose b’inkingi za mwamba batanze byose byabo kuri uyu mukino.
Agace ka Mbere karangiye Patriots itanga icyizere kuko yagatsinze ku manota 25-18 REG BBC. Agace ka Kabiri na ko katsinzwe na Patriots ikomeza kuyobora igice cya Mbere ku manota 43-38.
Uduce tubiri twa nyuma, ni ho REG BBC yagaragarije uburambe bwo ku rwego rwo hejuru kuko yahise itsinda agace ka Kane,nyuma y’uko Patriots yari yagatsinze ku manota 55-53, ariko umukino urangira ikipe y’baturage iwutakaje ku manota 70-79 ya REG BBC.
Ibi bisobanuye ko hagomba gukinwa umukino wa Gatatu uzatanga ikipe izegukana igikombe hagati y’izi ebyiri.
Tom Cleveland wa REG BBC, ni we watsinze amanota menshi muri uyu mukino [21], akora Rebound zirindwi anatanga imipira ivamo amanota igera kuri ine.
Mu yindi mikino yabaye mu bagabo, APR Basketball Club yasoje ku mwanya wa Gatatu muri shampiyona ya Basketball, ihabwa miliyoni 3,5 Frw, mu gihe mu bagore, RP-IPRC Huye Women Basketball Club yagize uwo mwanya ihabwa miliyoni 3 Frw.
- Advertisement -
Mu bagore, ikipe ya REG Women Basketball Club yatsinzwe umukino wa Kabiri na APR Women Basketball Club ku manota 65-58. Bisobanuye ko buri kipe imaze gutsinda umukino umwe, basigaranye undi umwe uzatanga ikipe yegukana igikombe cya shampiyona.
Imikino ya Gatatu mu byiciro byombi, iteganyijwe ku Cyumweru tariki 11 Nzeri 2022.
AMAFOTO: Shema/REG
UMUSEKE.RW
