Abarwanyi b’umutwe wa Al-Shabab bagera kuri 20 bishwe n’ingabo za leta ya Somalia mu gace ka Hiraan mu rukerera rwo kuri uyu wa Gatatu.
Mu rukerera rwo kuri uyu wa Gatatu, nibwo aba barwanyi ba al-Shabab bagerageje kugaba igitero kuri imwe mu nkambi y’ingabo za Somalia, gusa baje gukomwa mu nkokora kuko ingabo za leta zabashubije inyuma ndetse 20 muri bo baricwa abandi barahakomerekera.
Nk’uko byatangajwe na Minisiteri y’Itumanaho n’igisirikare cya Somali National Army, iyi mirwano yaguyemo abasirikare ba leta batatu.
Amakuru atangaza n’ikinyamakuru cya leta nuko mu ijoro ryo kuwa Kabiri, abandi barwanyi bane nabo barishwe mu karere ka Bal’ad mu gace ka Shabelle. Ni mu bikorwa birimo gukorwa n’ingabo za leta mu Majyaruguru n’Uburasirazuba bwa Hiraan.
Amakuru yatangajwe n’ikinyamakuru Hiraan avuga ko imirwano hagati y’ingabo za leta na al-Shabab yadutse mu gitondo cyo kuri uyu wa Kabiri mu biturage bya Yosaman na Berayabaal mu Karere ka Buulaburde.
Ingabo za leta ya Somalia zikomeje guhashya umutwe wa al-Shabab kubufatanye n’ingabo za Amerika ndetse n’iz’Umuryango w’Afurika Yunze Ubumwe ziri mu bikorwa byo kugarura amahoro muri iki gihugu.
Ingabo za Somalia zikaba zimaze kwigarurira bimwe mu biturage byari byari garuriwe na al-Shabab mu myaka ine ishize.
Ivomo: BBC
NKURUNZIZA Jean Baptiste / UMUSEKE.RW