Rutahizamu w’ikipe y’Igihugu y’u Bufaransa na Real Madrid, Karim Benzema, yegukanye umupira wa zahabu [Ballon d’Or] uhabwa umukinnyi witwaye neza muri uwo mwaka w’imikino.
Kuri uyu wa Mbere nibwo hatanzwe ibihembo by’abakinnyi bitwaye neza mu mwaka w’imikino 2021-2022.
Ni ibihembo bitangwa na France-Football, bigizwemo uruhare n’abanyamakuru barenga 200 ndetse n’abatoza.
Mu birori byabereye mu Bufaransa, rutahizamu w’Umufaransa ukinira Real Madrid, Karim Benzema, yaje imbere ya bagenzi be barimo Lewandowski, Mané n’abandi.
Uyu mukinnyi w’imyaka 34, muri uyu mwaka yegukanye igikombe cya shampiyona ya Éspagne, Uefa Champions League, Super Coupe ya Éspagne na Super y’i Burayi.
Yatsinze ibitego byinshi muri Uefa Champions League, atsinda byinshi no muri shampiyona y’icyiciro cya Mbere muri Éspagne. Yabaye umukinnyi mwiza wa Uefa muri uyu mwaka.
Benzema abaye Umufaransa wa Gatanu wegukanye iyi Ballon d’Or nyuma ya Raymond Kopa (1958), Michel Platini (1983, 1984, 1985), Jean Pierre Papin (1991) na Zinédine Zidane (1998).
Abandi uko bakurikiranye, harimo Sadio Mané (2), Kevin De Bruyne (3), Robert Lewandowski (4), Mohamed Salah (5), Kylian Mbappé (6), Thibaut Courtois (7), Vinisiur Junior (8), Luka Modric (9) na Erling Haaland (10).
Muri ibi birori harimo bamwe mu bahoze bakina umupira w’amaguru ku mugabane w’i Burayi, barimo Ronaldo Lui Nazario, Luis Figo n’abandi.
- Advertisement -
UMUSEKE.RW
