Ingabo za leta ya Uganda, UPDF zishe abarwanyi 11 b’umutwe ukorera ku butaka bwa Congo urwanya leta wa ADF, abandi umunani bafatwa ari bazima.
Mu rukerere rwo kuri uyu wa Kabiri, tariki 13 Ukuboza 2022, nibwo abarwanyi babarirwa hagati ya 20 na 30 ba ADF (Allied Democratic Forces) bagabye igitero ku butaka bwa Uganda, aho bambutse ku mupaka uhuza iki gihugu na Congo bavuye mu gace ka Boga.
Aba barwanyi ba ADF bakaba bagabye igitero mu gace ka Kyapa mu karere ka Ntoroko, aho bagabye iki gitero bambutse umugezi wa Semuliki, gusa abarwanyi 11 bahasize ubuzima, abandi 8 bafatwa ari bazima, nk’uko byemejwe n’Umuvugizi w’Ingabo za Uganda, Brig. Gen Felix Kulayigye.
Umuvugizi w’Ingabo za Uganda, Brig. Gen Felix Kulayigye yavuze ko uretse aba barwanyi bishwe, hafashwe n’intwaro z’aba barwanyi, aho hafashwe imbunda 10 zo mu bwoko bwa SMG.
Aba barwanyi bagabye iki gitero bakaba bari hagati y’abantu 20 na 30, gusa baje guteshwa n’ingabo za Uganda, aho ingabo za UPDF zije abaturage umutekano urambye.
Nubwo ingabo za Uganda zitabitangaje harimo amakuru avuga ko aba barwanyi ba ADF hari abaturage bishwe, abandi barakomereka mu gihe abandi bahungiye mu gihugu cy’abaturanyi mu gace ka Fort Portal.
Aba barwanyi ba ADF bagabye iki gitero mu gihe ingabo za Uganda, UPDF ziri muri Repubulika Iharanira Demokarasi ya Congo mu bikorwa byo guhashya uyu mutwe utavuga rumwe na Uganda, ibikorwa zifatanyije n’ingabo za leta ya Congo, FARDC.
Kuri uyu wa Mbere, nibwo ingabo za Uganda ziri muri Congo zatangaje ko zishe abarwanyi 30 bikekwako ari aba ADF bafatanyije n’ingabo za FARDC, aho biciwe mu gace ka Boga muri teritwari ya Ituri.
NKURUNZIZA Jean Baptiste/ UMUSEKE.RW