Abagore 626 bari bafungiye i Muhanga bimuriwe i Nyamagabe

Iki gikorwa cyo kwimura abagore kizasoza ejo kuwa mbere

Abagore 626 agorororerwaga muri Gereza ya Muhanga bimuriwe mu igororero ry’iNyamagabe ho mu Ntara y’Amajyepfo y’u Rwanda.

*Imodoka zisohoka mu igororero rya Muhanga zerekeza iNyamagabe*

Igikorwa cyo kwimura abagore 626 babarizwaga mu igororero rya Muhanga, cyatangiye kuri iki Cyumweru taliki ya 15 Mutarama 2023.

Minisitiri w’Umutekano Gasana Alfred yabwiye UMUSEKE ko inyubako yagenwe kugororerwamo abagore i Nyamagabe yuzuye ko icyari gisigaye ari ukuhimurira abagore bari mu igororero i Muhanga.

Gasana yavuze ko ibi bigamije kugabanya ubucucike bwavugwaga mu Igororero rya Muhanga.

Ati “Igororero rya Nyamagabe rifite ubushobozi bwo kwakira abagore barenga 2000 twafashe icyemezo cyo kubashyira i Nyamagabe bose kugira ngo ubucucike bugabanuke.”

Minisitiri Gasana avuga ko inyubako 1 y’Igororero rya Nyamagabe ishobora kwakira abarenga 1000 indi ikakira 1000.

Gusa yavuze ko iyi mibare 626 y’abagororerwaga i Muhanga ari ‘iyo yahawe mu minsi 5 ishize ko ishobora kuba imaze kwiyongera cyangwa yaragabanutse.

Igororero rya Nyamagabe kuri ubu ririmo abagore 1840 , Minisitiri Gasana avuga ko ritazarenza 2472.

Aba bagore 626 barimurwa mu gihe cy’iminsi 2 uhereye kuri iki Cyumweru.

Abagore bimuriwe i Nyamagabe barimo abakatiwe n’Inkiko n’abandi batarakatirwa bategereje guhabwa Ubutabera.