Mu mikino y’agace ka kabiri muri shampiyona ya Volleyball ikinwa n’abafite Ubumuga [Sitting Volleyball] yakiniwe mu Akarere ka Huye, amakipe yari ahagarariye Rusizi, Gisagara na Gasabo, yitwaye neza kurusha izindi.
Iyi mikino yabereye mu Akarere ka Huye, ku wa Gatandatu no ku Cyumweru tariki 14-15 Mutarama mu byiciro byombi.
Ubusanzwe iyi shampiyona ya Sitting Volleyball, ikinwa n’abafite Ubumuga, ariko imaze kugera ku rwego rushimishije kugeza aho ikipe z’Igihugu mu bagabo n’abagore, ziri mu zikomeye ku Mugabane wa Afurika.
Mu mikino y’umunsi wa mbere w’irushanwa mu bagabo, Intwari ya Gasabo yongeye kwitwara neza nk’ikipe ikomeye, itsinda imikino ine yahuyemo na Nyamasheke, Burera na Kicukiro ku maseti 2-0 ndetse na Musanze ku maseti 2-1.
Ku Cyumweru ho, Gasabo yatsinze indi mikino ibiri yahuyemo na Rwamagana ndetse na Muhanga, yombi ku maseti 2-0.
Indi kipe yitwaye neza mu bagabo ni iyari ihagarariye Akarere ka Rusizi, na yo itsinda imikino yose yahuyemo n’amakipe ya Karongi, Kicukiro, Rwamagana na Muhanga ku wa Gatandatu. Ku Cyumweru cya tariki 15 Mutarama, yatsinze Ngoma na Rutsiro, zombi ku maseti 2-0.
Gisagara yakinnye imikino itanu muri iyi minsi ibiri n’amakipe ya Gatsibo, Ngoma, Nyamasheke, Burera na Ruhango, yose iyitsinda ku maseti 2-0.
Mu bagore, amakipe yitwaye neza agasoza agace ka kabiri adatsinzwe ni Musanze na Bugesera. Iyi kipe yo mu Majyaruguru yabigezeho itsinze Ruhango, Rubavu, Gicumbi na Nyanza mu gihe iyo mu Burasirazuba yatsinze Rubavu, Nyarugenge, Ruhango na Gakenke.
Umutoza wa Bugesera SVB y’Abagore, Ndamyumugabe Emmanuel, yavuze ko kugira abakinnyi bakinira Ikipe y’Igihugu iheruka muri Shampiyona y’Isi hari icyo byamufashije, cyane mu mukino utaboroheye batsinzemo ikipe ya Rubavu amaseti 2-1 ku wa Gatandatu.
- Advertisement -
Ati “Ntabwo byabura kuko umukinnyi uvuye mu irushanwa mpuzamahanga nka ririya hari urwego aba amaze kugeraho, akuze mu mutwe. Budafashije cyane imbere y’ikipe ya Rubavu yashakaga kwica umukino wacu.”
Murema Jean Baptiste uyobora Komite y’Imikino y’Abafite ubumuga (NPC Rwanda), yashimye urwego imikino yariho, avuga ko bigaragaza iterambere ry’umukino wa Sitting Volleyball muri rusange.
Ati “Biratwereka ko amakipe yo mu turere yaba ay’abagore cyangwa ay’abagabo amaze gutera imbere ndetse ukabona ko n’urwego rw’abatoza hari aho rugeze ku buryo umukino ugenda uzamuka.”
Yongeyeho ko kimwe mu biri gufasha uyu mukino kuzamuka ari uko basabye amakipe kugira abakinnyi bakina Sitting Volleyball ukwabo ndetse n’abakina Sitball ukwabo.
Nyuma y’imikino y’agace ka kabiri, biteganyijwe ko agace ka gatatu ka Shampiyona ya Sitting Volleyball, kazakinwa hagati ya tariki 11 n’iya 12 Werurwe 2023 mu Karere ka Gicumbi.
Nyuma y’aka gace ni bwo amakipe ane ya mbere muri buri cyiciro azahurira mu gace ka kane (play-offs) kazatanga ikipe zegukana ibikombe. Iyi mikino ya nyuma izabera i Gisagara hagati ya tariki ya 6 n’iya 7 Gicurasi 2023.
UMUSEKE.RW
