Irushanwa rya Volleyball ryo kwibuka Padiri Kayumba, ryegukanywe n’amakipe ya Forefront mu byiciro byombi na Groupe Scolaire Mugombwa mu cyiciro cy’amashuri yisumbuye.
Ni irushanwa ngarukamwaka ryabaga ku nshuro ya 13. Ryakinywe iminsi ibiri yo ku wa Gatandatu 11 no ku Cyumweru tariki 12 Werurwe 2023, ribera muri Groupe Scolaire Officiel de Butare nk’ahasanzwe ari igicumbi cy’uyu mukino.
Iri rushanwa ryatangijwe mu rwego rwo gukomeza guha agaciro Padiri Kayuma wahoze ari umuyobozi wa Groupe Scolaire Officiel de Butare, kubera uruhare rukomeye yagize mu guteza imbere umukino wa Volleyball.
Mu bagabo, ikipe ya Forefront Volleyball Club yegukanye igikombe itsinze REG VC amaseti 3-1, iyi kipe inacyegukana mu cyiciro cy’abagore itsinze RRA amaseti 3-2.
Mu cyiciro cya Kabiri, ikipe ya GS St Joseph Kabgayi yegukanye igikombe itsinze Nyanza TSS amaseti 3-2. Mu mashuri yisumbuye, ikigo cya GS Mugombwa cyegukanye igikombe gitsinze PSVF amaseti 3-2.
Mu bakanyujijeho, Umucyo Club yabaye iya mbere itsinze ikipe ya Tout Age amaseti 3-2.
Iri rushanwa ryongeye kugaragaza ko mu Karere ka Huye ari igicumbi cy’umukino wa Volleyball, bitewe n’ubwitabire bw’abakunzi b’uyu mukino bari baje gushyigikira amakipe bihebeye.
Padiri Kayumba Emmanuel yabaye Umuyobozi wa Groupe Scolaire Officiel de Butare (Indatwa n’Inkesha), yitabye Imana mu 2009 ariko guhera mu 2010 hatangira irushanwa ryamwitiriwe mu rwego rwo gukomeza kuzirikana uruhare rwe mu mukino wa Volleyball.
UMUSEKE.RW
