Ikipe ya Police FC yungukiye mu bibazo Rayon Sports imazemo iminsi, iyitsindira kuri Stade ya Muhanga mu mukino w’umunsi wa 25 wa shampiyona.
Ni umukino watangiye Saa Cyenda z’amanywa, wari wakiriwe n’ikipe ya Rayon Sports yari yagabanyije ibiciro byo kuwureba.
Ikipe ya Police FC yatangiranye imbaraga nyinshi uyu mukino, yabonye igitego cya kare cyatsinzwe na Usengimana Danny ku munota wa 15 w’umukino.
Gusa ntabwo byatinze, ikipe ya Rayon Sports ibifshijwemo na Paul Were yahise yishyura iki gitego ku munota wa 23.
Bidatinze, Hakizimana Muhadjiri atsindira Police igitego cya Kabiri ku munota wa 25 ariko ku wa 27 Moussa Essenu aracyishyura bituma iminota 45 y’igice cya mbere irangira amakipe yombi anganya ibitego 2-2.
Igice cya Kabiri Police yagitangiranye imbaraga ikomeza gusatira cyane Rayon Sports ariko Hakizimana Adolphe wari mu izamu akomeza gufasha ikipe ye.
Ku munota wa 66 ikipe y’Igipolisi yakoze impinduka, ikuramo Hakizimana Muhadjiri na Usengimana Danny basimburwa na Kayitaba Bosco na Ntirushwa Aime banafashije ikipe ya bo.
Ibintu byongeye kuba bibi ku ikipe ikunzwe na benshi mu Rwanda, ubwo Ntirushwa Aime yatsindiraga Police FC igitego cya Gatatu ku munota wa 79.
Mu gihe umukino uri kurangira, Kayitaba Bosco yashyizeho umutemeri atsindira ikipe ye igitego cya kane, maze amanota atatu yuzuye ataha Kacyiru.
- Advertisement -
Gutsindwa uyu mukino kwa Rayon Sports byatumye AS Kigali iyegera kuko yagumanye amanota 46 mu gihe AS Kigali yagize 42 nyuma yo gutsinda Mukura VS igitego 1-0.
Indi mikino yabaye:
Marine FC 4-1 Musanze FC
Gorilla FC 1-1 Sunrise FC
Rutsiro FC 0-1 Rwamagana City.
Imikino iteganyijwe ku Cyumweru tariki 2 Mata 2023:
Espoir FC vs Kiyovu Sports
APR FC vs Bugesera FC
Étincelles FC vs Gasogi United
UMUSEKE.RW