Ikipe y’Ingabo z’Igihugu, yatsinze iyo ku Mumena ibitego 2-1 mu mukino wo kwishyura wa 1/2 w’Igikombe cy’Amahoro, ihita inayisezerera.
Uyu mukino witabiriwe n’abakunzi ba ruhago batari bake, watangiye. Saa Cyenda z’amanywa kuri Kigali Pelé Stadium.
Kiyovu Sports yatangiye ibonana neza ndetse bituma ibona igitego ku munota wa cumi cyatsinzwe na Riyad Nordien, ku mupira uteretse yateye maze Ishimwe Pierre wari mu izamu rya APR FC ntiyabona aho uciye.
Gusa nyuma yo gutsinda igitego, ikipe yo ku Mumena hashoboraga kubona ikindi gitego ku munota wa 32 ariko Riyad acisha umupira ku ruhande yari ahawe na Bigirimana Abedi.
Ikipe y’Ingabo yahise ikanguka ndetse na yo itangira kubonana neza biciye kuri Mugisha Gilbert na Kwitonda Alain bakina mu busatirizi.
Ibintu byabaye byiza ku kipe y’Ingabo, ku munota wa 44 ubwo Nshuti Innocent yayitsindiraga igitego cyo kwishyura kuri koruneri yari itewe na Kwitonda Alain Bacca.
Igice cya Mbere cyarangiye ikipe zombi zinganya, igitego 1-1. Kugeza aha byari bisobanuye ko byose zinganya kuko ari na ko umukino ubanza warangiye.
Igice cya Kabiri kigitangira, APR FC yari ifite inyota yo kubona igitego cy’intsinzi ndetse biranayikundira ikibona ku munota wa 55 cyatsinzwe na Ishimwe Christian watereye umupira ku ruhande rw’ibumoso maze Kimenyi Yves ntiyamenya ibibaye.
Kubona igitego cy’itsinzi ku kipe y’Ingabo, byasobanuraga yiyongereye amahirwe yo gusezerera Kiyovu Sports.
- Advertisement -
Urucaca rwakomeje gukora amakosa menshi, ndetse binatuma rwerekwa amakarita y’umuhondo kuri Serumogo Ally na Ndayishimiye Thierry.
Mateso utoza Kiyovu, yahise akora impinduka akuramo Riyad Nordien wagaragazaga umunaniro asimburwa na Muhozi Fred wasabwaga kwihutisha imipira igana imbere.
APR FC na yo yahise ikora impinduka, ikura Bizimana Yannick asimburwa na Itangishaka Blaise wari uje kongera imbaraga hagati mu kibuga.
Urucaca rwagaragaza gutinya APR FC, rwakomeje gushaka igitego cyo kwishyura ngo byibura rushake intsinzi ariko biranga.
Ikipe y’Ingabo yakomeje gucunga intsinzi ya yo kugeza iminota 90 irangiye, maze isezerera ikipe yo ku Mumena ku giteranyo cy’ibitego 3-2 mu mikino yombi. Bisobanuye ko ikipe y’Ingabo yasanze Rayon Sports ku mukino wa nyuma uzabera i Huye.
UMUSEKE.RW