Ishyirahamwe Nyarwanda ry’Umupira w’Amaguru, Ferwafa, ryavuze ko ryishimiye urwego Mukansanga Salma na Uwikunda Samuel bagezeho rwo guhembwa n’Impuzamashyirahamwe y’Umupira w’Amaguru muri Afurika, CAF.
Iri shyirahamwe ribicishije ku rukuta rwa Twitter, rwagaragaje ko rwishimiye abasifuzi mpuzamahanga babiri b’Abanyarwanda bageze ku rwego rwi guhembwa na CAF buri kwezi.
Bagize bati “Ferwafa yishimiye gutangaza ko CAF yemeje abasifuzi babiri b’Abanyarwanda, Uwikunda Samuel na Mukansanga Salma muri 25 basifura kinyamwuga.”
Aba basifuzi babarizwa mu cyiciro cyizwi na ‘Elites’ ba CAF, basanzwe bahembwa n’uru rwego buri kwezi. Amakuru avuga ko bahembwa arenga ibihumbi 2$ buri kwezi.
Mukansanga na Uwikunda bakomeje kubaka izina ku Mugabane wa Afurika nk’abasifuzi beza, cyane ko bombi baherutse gusifura amarushanwa akomeye arimo Igikombe cy’Isi, Igikombe cya Afurika cy’abakina imbere mu gihugu [CHAN] n’indi mikino ikomeye ku mugabane wa Afurika.
UMUSEKE.RW
