Umusirikare mu ngabo za Uganda, UPDF yarashe mu cyico Minisitiri wungirije w’uburinganire n’umurimo yari acungiye umutekano.
Colonel ( Rtd) Charles Okello Engola, wari Minisitiri wungirije w’uburinganire n’umurimo yarasiwe iwe mu rugo kuri uyu wa 02 Gicurasi 2023.
Uwamurashe yabanje kugenda arasa mu kirere mu bice bikikije urugo rwa( Rdt) Col Okello Engola ndetse asakuza ko adaheruka umushahara.
Nyuma yo kurasa uwo mutegetsi yarashinzwe gucungira umutekano na we yahise yirasa arapfa.
Umuvugizi wa Polisi yo ku rwego rw’Umurwa Mukuru wa Kampala, Luke Owoyesigire, yemeje ko uyu munyapolitiki yarashwe.
Umukuru w’inteko ishinga Amategeko ya uganda Anita Among nawe yavuze ko ari inkuru iteye agahinda, asabira Engola iruhuko ryiza.
Colonel (Rtd) Charles Okello Engola, yari afite imyaka 64 y’amavuko, yigeze kuba Minisitiri wungirije w’ingabo.
MURERWA DIANE / UMUSEKE.RW
