Amatike yo kwinjira mu gitaramo cyiswe “5 Years Anniversary Live Concert” cyateguwe na Kigali Protocal kizaba ku wa 29 Kamena 2023 muri Camp Kigali yatangiye kugurishwa.
Ni igitaramo cyo kwizihiza imyaka itanu sosiyete ya Kigali Prorocal imaze ishinzwe aho kwinjira ari 5000 Frw mu myanya isanzwe, itike y’ibihumbi 10 Frw, mu gihe VIP yo yashyizwe ku bihumbi 15 Frw naho VVIP yo ikaba ibihumbi 20 Frw.
Abahanzi barimo Chris Eazy, Ruti Joel, Ariel Wayz, Bushali na Boy Chopper nibo bazasusurutsa abazitabira iki gitaramo.
Ni igitaramo kandi kizayoborwa na Patrick Rusine umunyarwenya umaze kubaka izina mu Rwanda aho azafatanya na Lucky Nzeyimana uzwi kuri Televiziyo y’Igihugu.
Gutambuka ku itapi itukura bizayoborwa na Ally Soudy, Miss Darina Kayumba wambitswe ikamba ry’Igisonga cya Kabiri cya Nyampinga w’u Rwanda mu 2022 na Mutabazi Isingizwe Sabine witabiriye irushanwa uwo mwaka.
Iki gitaramo kandi cyatumiwemo abagezweho mu kuvanga imiziki barimo Dj Briane na Dj June bazanyeganyeza imitima y’abanyabirori.
Umukundwa Josue, Umuyobozi wa Kigali Protocal avuga ko uzaba ari umwanya mwiza wo kunogerwa n’umuziki no gukomeza kwishimira ibyagezweho, ariko banagaragaza ingamba z’ahazaza ha sosiyete abereye umuyobozi.
Avuga ko abahanzi batumiwe ari abo mu kiragano gishya kandi bakunzwe imbere mu gihugu no hanze.
Yagize ati “Twabatekerejeho kuko bose baririmba injyana zitandukanye kandi ziryohera benshi. Twiteze ko abantu bazaza kudushyigikira no kwishimana natwe.’’
- Advertisement -
Abifuza kugura amatike yo kwitabira “5 Years Anniversary Live Concert” bahamagara 0788230778 cyangwa bakanyura kuri https://noneho.com/5yearsAnniversaryLiveConcert1687274595600
NDEKEZI JOHNSON / UMUSEKE.RW
