Umusirikare muto ushinjwa ko ari we umwaka ushize wanogeje umugambi wo guhirika ku butegetsi Perezida Adama Barrow yateye utwatsi ibyo akurikiranyweho byose.
Mu Ukuboza 2022, Guverinoma ya Gambia yaburijemo umugambi wo guhirika ubutegetsi ndetse ita muri yombi abasirikare barangajwe imbere na Lance Corporal Sanna Fadera.
Icyo gihe iperereza rya gisirikare niryo ryatahuye uwo mugambi wo guhirika ubutegetsi bwa Perezida Adama Barrow.
Imbere y’Urukiko Lance Corporal Sanna Fadera yari kumwe n’abandi basirikare babiri n’Umupolisi umwe bakurikiranyweho icyaha cyo kugambanira igihugu, ubuhemu no kwigomeka.
Yabwiye Urukiko ko atigeze ateganya guhirika Guverinoma cyangwa ngo ashishikarize umuntu n’umwe kwigomeka ku butegetsi.
Yateye utwatsi umutangabuhamya wa Leta wamushinje ko yamusabye kumujyana mu bapfumu muri Mauritania nyuma akazamugororera kumugira ushinzwe ubutasi.
Fadera yamaganye kandi ibyo Sergent Karamo Jatta avuga ko yamweretse gahunda y’ibikorwa no kohereza itsinda ry’aba Komando avuga ko “atigeze abona ibiri muri iyo nyandiko ashinjwa.”
Avuga ko nta Lance Corporal nta bushobozi namba afite bwo kohereza abakomando cyangwa izindi ngabo ku rugamba rwo guhirika ubutegetsi.
Urubanza rurakomeje mu gihe Lance Corporal Federa asaba gufungurwa kuko ibyo aregwa ari ibihuha bidafite gihamya.
- Advertisement -
Gambia iyobowe na Adama Barrow guhera mu 2017 ubwo yatsindaga mu matora Yahya Jammeh, wari umaze imyaka 22 ku butegetsi.
IVOMO: VOICE GAMBIA
MURERWA DIANE / UMUSEKE.RW
