Kiyovu Sports yabonye umutoza mushya

Ubuyobozi bw’ikipe ya Kiyovu Sports bwatangaje ko iyi kipe yamaze kubona umutoza mushya ukomoka ku Mugabane w’i Burayi.

Nyuma yo gusoza shampiyona iri ku mwanya wa Kabiri ikanasoreza ku mwanya wa Kane mu gikombe cy’Amahoro, ikipe ya Kiyovu Sports yahise itandukana n’abari abatoza ba yo.

Nyuma yo gutandukana n’abari bahari, iyi kipe yahise itangaza ko yasinyishije undi mutoza ukomoka mu Bugiriki, Petros Koukouras.

Babicishije kuri Twittter, bagize bati “Twasinyishije umutoza mukuru w’ikipe. Amazina ye ni Petros Koukouras.”

Uyu mutoza w’imyaka 34, yaherukaga gutoza SC Villa yo muri Uganda mu 2020/2021 ariko yaciye no mu yandi makipe atandukanye.

Mu 2014 yari umutoza wungirije muri Sparta FC, mu 2015 yatozaga Apollon Pontus FC. Mu 2018-2019 yatozaga Pacific Heroes FC yahoze yitwa Dunkwa United.

Mu 2019/2020 Petros yari umutoza wungirije mu kipe y’Igihugu ya Sudan y’Epfo.

Aje asimbura Umubiligi, Alain-André Landeut na Mateso Jean de Dieu bari bafite ikipe umwaka ushize w’imikino 2022/2023.

UMUSEKE.RW