Muri Tombola y’uko amakipe azahura mu mikino Nyafurika y’ayayabaye aya mbere iwa yo, CAF Champions League, APR FC yisanze izahura n’ikipe yo muri Somalia mu ijonjora rya mbere, mu gihe Rayon Sports yo itaramenya igihugu izaheramo hagati ya Kenya na Libya.
Kuri uyu wa Kabiri ni bwo ku Cyicaro gikuru cy’Impuzamashyirahamwe y’Umupira w’Amaguru muri Afurika, CAF, giherereye i Cairo mu Misiri, habereye tombola y’uko amakipe azahura muri CAF Champions League na CAF Confedération Cup.
Iyi tombola, yasize APR FC yegukanye igikombe cya shampiyona mu Rwanda, izahura na Gaadiidka FC ibitse igikombe cya shampiyona yo muri Somalia.
Izasezerera indi muri iki cyiciro, izahura na Pyramids FC yo mu Misiri. Izasezerera indi muri iri jonjora rya Kabiri, izahita ibona itike yo kujya mu matsinda ya CAF Champions League.
Ku rundi ruhande, ikipe ya Rayon Sports iheruka kugera muri 1/4 cy’amakipe yegukanye ibikombe iwa yo, CAF Confedération Cup, izahura n’izaba yasezereye indi hagati ya Kakamega Home Boys yo muri Kenya na El Hilal yo muri Libya. Isezereye indi mu ijonjora rya Kabiri, ihita ibona itike yo kuzakina amatsinda.
Imikino ibanza ya CAF Champions League n’iya CAF Confedération Cup izakinwa tariki 15,16 na 17 Nzeri. Iyo kwishyura izakinwa tariki 29&30 Nzeri na tariki 1 Ukwakira.
UMUSEKE.RW