Abantu batandatu nibo bimaze kumenyakana ko baguye mu myigaragambyo karundura yabaye muri Kenya kuri uyu wa Gatatu, ubwo abaturage bongeraga kwigabiza imihanda bamagana imisoro ihanitse n’ikuguzi cy’imibereho gikomeje kuzamuka.
Hari amakuru avuga ko umubare w’abapfuye ushobora kwiyongera kuko hari abantu benshi bakomerekeye muri iyo myigaragambyo.
Ibitangazamakuru byo muri kiriya gihugu byatangaje ko Polisi mu murwa mukuru Nairobi, yagaragaye itera imyuka iryana mu maso abigaragambya batwikaga amapine, abandi batera amabuye.
Amashuri yafunzwe muri Nairobi na Nakuru mu gihe abigaragambya bagera kuri 300 bamaze gutabwa muri yombi.
Abana b’abanyeshuri bagera kuri 50 bari mu bitaro nyuma y’uko ishuri ryabo i Nairobi ritewemo imyuka iryana mu maso izwi nka ” Tear Gas”.
Mu cyumweru gishize, abantu bagera kuri 14 bapfiriye mu myigaragambyo, abagera ku 10 barashwe n’abapolisi.
Iyi myigaragambyo ni uruhererekane rw’imaze iminsi itumizwa na Raila Odinga utavuga rumwe na Leta, ashishikariza abaturage kwamagana Leta avuga ko itabitaho.
Inzego z’umutekano za Kenya zirashinjwa gukoresha ingufu z’umurengera no guhonyora uburenganzira bw’abigaragambya ari nabyo bivamo impfu za hato na hato.
MURERWA DIANE / UMUSEKE.RW