Umuyobozi wa Kiyovu Sports Limited, Mvukiyehe Juvénal yanenze Abanyamuryango ba Kiyovu Sports Association bitewe no kwirengagiza inshingano zo gufasha ikipe ya bo.
Kuri iki Cyumweru tariki 16 Nyakanga 2023, habaye Inama y’Inteko Rusange yahuje Abanyamuryango ba Kiyovu Sports Association.
Muri iyi Nteko Rusange, hagarutswe ku ngingo zitandukanye zirimo kugaragaza uko ikipe yabayeho mu myaka itatu ishize.
Ubwo Mvukiyehe Juvénal uyobora Kiyovu Sports Ltd yari afashe ijambo, yagaragaje ko abanyamuryango batereranye ikipe mu myaka ibiri ishize.
Ati “Association yatereranye ikipe. Mu myaka ibiri ishize, nta misanzu abanyamuryango batanze. N’ibihumbi 5 Frw byasabwe ngo hajye hategurwa imikino, ntabwo yatanzwe.”
Mvukiyehe yakomeje agira ati “Abanyamuryango mwabaye ba ntibindeba. Turasaba ko ikipe yasubizwa muri Association, imisanzu yacu tukajya tuyohereza muri Association.”
Gusa mu kugorora imvugo y’uyu muyobozi, Visi Perezida wa Kiyovu Sports Association, Mbonyumuvunyi Karim, yavuze ko kuba hari ibitaragezweho bidasobanuye ko Abanyamuryango birengagije inshingano.
Ati “Ntabwo bisobanuye ko Association ntacyo yakoze, ahubwo hari inshingano tutanogeje neza ari na ho mpera nsaba Abanyamuryango kwikubita agashyi.”
Abafashe ijambo bose muri iyi nteko rusange, bagaragaje ko banenga Abanyamuryango batubahirije inshingano za bo uko byari bikwiye.
- Advertisement -
UMUSEKE.RW
