Ubuyobozi bw’igisirikare cya Niger bwavuze ko bwaburijemo umugambi wo guhunga kwa Perezida Mohamed Bazoum wahiritswe ku butegetsi muri Nyakanga 2023.
Umuvugizi w’igisirikare cya Niger Col. Major Amadou Abdramane, ku wa 19 Ukwakira, yatangarije kuri Television y’Igihugu, ko mu gitondo cyo ku wa Kane Perezida Bazoum, umuryango we hamwe n’abashinzwe umutekano babiri bagerageje gutoroka aho bari bafungiye.
Yongeyeho ko umugambi wo gushaka gutoroka waburijwemo barafatwa. Yavuze ko bateganyaga gukoresha kajugujugu y’igihugu gikomeye ku isi bakerekeza muri Nigeria.
Yavuze kandi ko yamaganye imyitwarire ya Bazoum idahwitse.
Perezida Bazoum yahiritswe ku butegetsi n’igisirikare ashinjwa ko yananiwe gukemura ibibazo by’umutekano muke mu gihugu uterwa n’imitwe yitwara gisirikare.
Kuva Perezida Bazoum yahirikwa ku butegetsi n’Abasirikare ku ya 26 Nyakanga, yanze kwegura.
Kugeza ubu, yari afungiye mu rugo rwe mu ngoro ya Perezida hamwe n’umuryango we, ariko aho bahise bafungirwa ubu ntiharamenyekana.
BBC
UMUSEKE.RW