Umunyezamu w’ikipe y’Igihugu y’u Rwanda y’umupira w’amaguru, Amavubi, Ntwari Fiacre, unakinira ikipe ya TS Galaxy muri Afurika y’Epfo, yafashije ikipe ye gusezerera ikipe ya Mamelodi Sundowns.
Mu ijoro rya tariki ya 18 Ukwakira 2023, kuri Mbombela Stadium muri Afurika y’Epfo haberaga umukino wa ⅛ mu Gikombe cyiswe Carling Knockout Cup, wahuzaga ikipe ya Mamelodi Sundowns na TS Galaxy isanzwe ikinwamo n’umuzamu w’ikipe y’Igihugu Amavubi, Ntwari Fiacre.
Muri uwo mukino warangiye impande zombi zinganyije ibitego bibiri kuri bibiri hitabajwe iminota 30 y’inyongera nabwo biranananirana maze amakipe ajya gutera penaliti.
Ntwari Fiacre wari wabanje mu kibuga ahagaze mu biti by’izamu yaje gufasha ikipe ye gukomeza muri ¼ ubwo yakuragamo penaliti ebyiri mu mukino harimo iya mbere yari itewe na Brian Onyango wa Mamelodi ndetse n’iya gatandatu yatewe na Lesiba Nku, TS Galaxy ya Fiacre iba ikomeje itsinze penaliti eshanu kuri enye za Mamelodi Sundowns.
Ikipe ya TS Galaxy ni yo ya mbere yabonye itike ya ¼ muri Carling Knockout Cup, kuko indi mikino izakinwa mu mpera z’iki cyumweru.
Mbere yo kuva mu Rwanda, Fiacre yakiniye APR FC yazamukiyemo, atizwa Marines FC, ayivamo ajya muri AS Kigali yavuyemo yerekeza muri Afurika y’Epfo.
MUGIRANEZA THIERRY/UMUSEKE.RW
