Umuryango w’Ubumwe bw’Uburayi (UE/EU wamaze gutangaza ko wikuye mu ndorerezi z’amatora nkuko byari biteganyijwe kubera impamvu bita ko “ari iza tekini zirenze uyu muryango.”
RDCongo iritegura amatora ateganyijwe guhera tariki ya 20 Ukuboza 2023 ndetse ubu abakandida bari kugaragariza abaturage imigabo n’imigambi.
Umuvugizi w’urwego rw’ububanyi n’amahanga n’umutekano muri EU, Nabila Massrali, yavuze ko bahisemo kureka kohereza indorerezi mu matora kubera “ingorane za tekiniki zirenze UE”.
EU ivuga ko yateganyaga kohereza indorerezi nyinshi mu ntara 26 zigize DR Congo, mu matora ateganyijwe kuba ku itariki ya 20 Ukuboza “ariko ubu ibyo ntibigishobotse.
EU yasabye abategetsi ba DR Congo n’abandi bafatanyabikorwa “gukomeza umuhate wabo kugira ngo Abanyecongo bashobore gushyira mu bikorwa mu buryo bwuzuye uburenganzira bwabo… mu matora ari imbere“.
EU yavuze ko hamwe n’abategetsi ba Congo, barimo kwiga ku bundi buryo bushoboka, burimo nko kuba ishobora kuhagumisha ubutumwa bw’inzobere mu matora “kugira ngo bugenzure igikorwa cy’amatora buri mu murwa mukuru.”
Ibiro ntaramakuru Reuters byatangaje ko indorerezi z’amatora za EU zari zarageze i Kinshasa, kandi ko zari zitezwe koherezwa mu bice bitandukanye by’igihugu ku itariki ya 21 y’uku kwezi kw’Ugushyingo ariko ko bitashobotse ku mpamvu z’umutekano.
Umudiplomate w’Umunyaburayi utifuje gutangazwa izina, avuga ko hari ibibazo byavutse ku kohereza indorerezi mu ntara.
Yagize ati: “Ubwo indorerezi zo kohereza kure zari zigiye kugenda, abategetsi batangiye kuzana ibibazo bijyanye n’ibikoresho bikorana n’ibyogajuru, no gushyiraho ibisabwa bitatuma indorerezi zikora mu mutekano no mu bwigenge hanze ya Kinshasa.”
- Advertisement -
Repubulika ya Demokarasi ya Congo ivuga ko “ibabajwe” n’icyemezo cy’umuryango w’Ubumwe bw’Uburayi (UE/EU) cyo kureka kohereza indorerezi z’amatora yo mu kwezi gutaha.”
Mu itangazo, minisiteri ya DR Congo ishinzwe itangazamakuru yavuze ko guverinoma “ibabajwe n’iburizwamo ry’ubu butumwa bw’amatora”, ivuga ko bwari bwasabye kuba indorerezi ku bushake bwabwo.
Yongeraho ko ibi bibaye mu gihe ibiganiro byari bikomeje hagati ya leta n’inzobere za EU “ku buryo bushoboka bw’iyoherezwa” ry’izo ndorerezi.
Uku kwisubiraho kwa EU kubaye nyuma y’ibyumweru bibiri Perezida Félix Tshisekedi avuze ko amatora ya perezida azaba nta gisibya, ariko ko bitazashoboka ko abaho i Masisi n’i Rutshuru mu ntara ya Kivu ya Ruguru kubera umutekano mucye muri utu turere two mu burasirazuba bw’igihugu.
UMUSEKE.RW
