Uwihoreye Martin wo mu Karere ka Bugesera, Umurenge wa Rilima wari usanzwe akora akazi k’uburobyi ubwo yari mu kiyaga cya Rumira, umuyaga mwinshi wubitse ubwato bwe ahaburira ubuzima.
Ni impanuka yabaye ku mugoroba wo ku wa 12 Ukuboza 2023, ni mu gihe umurambo wa nyakwigendera wabonetse mu gitondo cyo kuri uyu wa 13 Ukuboza.
Sebarundi Ephrem, Umunyamabanga Nshingwabikorwa w’Umurenge wa Rilima yabwiye UMUSEKE ko ubwo umuyaga wabaga mwinshi, Uwihoreye yagerageje kwirwanaho, ubwato bwe bwiyubika mu kiyaga.
Yavuze ko ubwo nyakwigendera yarohamaga hari bagenzi be bari hafi y’inkombe barwanye no gucika uwo muyaga wari mwinshi.
Yagize ati “Yari mu bwato wenyine ariko hari abandi bagenzi be bari mu kiyaga babonye umuyaga uje ari mwinshi bagerageza guhungira imusozi.”
Gitifu Sebarundi yongeye kwibutsa abaroba mu kiyaga cya Rumira kwitwararika amakoti yabugenewe ndetse no kujya bashishoza bakareba ikirere uko gihagaze mbere yo kujya mu kiyaga.
Umurambo wa Uwihoreye w’imyaka 37 hategerejwe ko ukorerwa isuzuma mbere yo gushyingurwa.
MURERWA DIANE
UMUSEKE.RW i Bugesera
