Ikipe ya Rayon Sports yatsindiye Mukura Victory Sports i Huye igitego 1-0 cyatsinzwe na Ngendahimana Eric, mu mukino w’umunsi wa 25 wa shampiyona y’icyiciro cya mbere.
Ni umukino wabaye kuri uyu wa Gatandatu tariki ya 30 Werurwe 2024, kuri Stade Mpuzamahanga ya Huye, saa Cyenda.
Umutoza Julien Mette wa Rayon Sports utari ufite Kapiteni Muhire Kevin kubera amakarita y’umuhondo, yabanje mu kibuga Khadime Ndiaye, Mitima Isaac, Nsabimana Aimable, Ngendahimana Eric, Bugingo Hakim, Serumogo Ali, Kanamugire Roger, Kalisa Rashid, Rudasingwa Prince, Iraguha Hadji na Tuyisenge Arsene ‘Tuguma’.
Mukura Victory Sports yo yari yabanjemo Sebwatao Nicolas, Ngirimana Alex, Muvandimwe Jean Marie Vianney, Kayumva Soter , Ciza Jean Paul, Mahoro Fidel, Ndayogeje Gerard, Samuel Pimpong, Kubwimana Cedric, Mohamed Sydi Sylla na Iradukunda Elie Tatou.
Rayon Sports yatangiye umukino isatira ngo irebe uko yafungura amazamu hakiri kare. Ku munota wa 10 w’umukino, Tuyisenge Arsene yatereye inyuma y’urubuga rw’amahina ishoti riremereye, umupira Sebwatao Nicolas urindira Mukura VS amushyira kanze. Nyuma y’aho Rayon Sports yateye koruneri eshatu zikurikirana, ariko ntizayiha umusaruro.
Rayon Sports yakomeje kotsa igitutu izamu rya Mukura ariko abasore nka Iraguha Hadji ntibabashe kurema uburyo bwa nyabwo bwatera icyikango ubwugarizi bwa Mukura VS.
Mukura na yo yanyuzagamo igasatira nk’ikipe iri mu rugo. Nko ku munota wa 30 w’umukino, yashoboraga kubona igitego ku ikosa Mutima Isaac, wari Kapiteni kuri uyu mukino, yakoreye Iradukunda Elie Tatou, ariko coup franc nziza yari iteretse ku murongo w’urubuga rw’amahina iterwa hejuru y’izamu na Elie Tatou.
Mu minota 15 ya nyuma ngo igice cya mbere kirangira yihariwe na Mukura VS yarushaka Rayon Sports mu kibuga hagati. N’ubwo Elie Tatou na Samuel Pimpong bahagizaga ba myugariro ba Rayon Sports, ntibigeze babasha kubona igitego.
Igice cya mbere cy’umukino cyarangiye amakipe yombi aguye miswi 0-0.
- Advertisement -
Igice cya kabiri cyatangiye amakipe yombi yagabanyije umurego, ukurikije uko bakinaga mu gice cya mbere cy’umukino.
Ku munota wa 62 w’umukino nibwo Rayon Sports yafunguye amazamu ku gitego cyatsinzwe na Ngendahimana Eric n’umutwe kuri koruneri yari itewe na Bugingo Hakim.
Nyuma yo gutsindwa igitego, Mukura VS yongereye imbaraga mu busatirizi, ikuramo Samuel Pimpong ishyiramo Bruno Youni.
Ku rundi ruhande, Rudasingwa Prince yahaye umwanya Charles Baale kugira ngo bashake igitego cy’umutekano.
Nyuma y’iminota itatu atsinze igitego, Ndengahimana yongeye guhusha ikindi gitego cy’umutwe cyari cyabazwe. Mukura na yo yatangiye gukanguka ishaka uko yagombora, ariko Elie Tatou wageragezaga uburyo yakwinjira mu rubuga rw’amahina rwa Murera, akazibirwa na ba myugariro.
Mukura VS yakomeje kotsa igitutu ishaka igitego, ari na ko yongeramo amaraso mashya, kugeza ubwo n’Umunyezamu Khadime Ndiaye wa Rayon Sports yerekwa ikarita y’umuhondo kubera gutinza iminota.
Umukino warangiye Rayon Sports itahukanye intsinzi y’igitego 1-0.
Rayon Sports nyuma yo gutsindira Mukura VS i Huye yahise igira amanota 48 ifata umwanya wa kabiri, irushwa 10 na APR FC iyoboye Shampiyona, mu gihe Mukura VS yo yagumanye amanota 39.
Gutsinda uyu mukino bivuze ko nubwo APR FC yatsinda Muhazi United ku Cyumweru, gutwara igikombe bizasaba gutegereza Umunsi wa 26 wa Shampiyona.
ISHIMWE YARAKOZE SETH KEFA/UMUSEKE.RW
