Umunyamakuru uzwi cyane muri Repubulika ya Demokarasi ya Congo Stanis Bujakera yakatiwe gufungwa amezi atandatu, ariko ashobora gufungurwa mu masaha ari imbere.
Bujakera yafunzwe kuva ku itariki ya 8 Nzeri mu 2023, icyo cyemezo cyo ku wa mbere cy’urukiko rwo mu murwa mukuru Kinshasa gisobanuye ko yarangije kumara icyo gihe afunze.
Urukiko rwamuhamije gukwirakwiza amakuru y’ibihuha no gukoresha inyandiko mpimbano, rumukatira gufungwa amezi atandatu no kuriha ihazabu y’amadolari 400 y’Amerika (angana na 516,000Frw).
Urubuga rw’amakuru Actualité.cd akorera rwo muri icyo gihugu rwavuze ko rwamaganye icyo gihano yakatiwe kandi ko umuyobozi wungirije warwo azajuririra icyo cyemezo cy’urukiko.
Ku itariki ya 8 y’uku kwezi, umushinjacyaha Serge Bashonga yari yamusabiye gufungwa imyaka 20 ku birego byo gukwirakwiza inyandiko mpimbano zijyanye n’ubutasi bwa gisirikare ku rupfu rw’umunyapolitiki utavuga rumwe n’ubutegetsi Chérubin Okende.
Ku itariki ya 13 Nyakanga mu mwaka ushize, umurambo wa Okende wari uwo mu ishyaka Ensemble Pour La République rya Moïse Katumbi , bawusanze mu modoka ye mu gitondo i Kinshasa ahitwa Limeté, warashwe amasasu, nyuma y’umunsi ishyaka rye ritangaje ko yashimuswe n’abitwaje intwaro.
Ubushinjacyaha bwakomeje kuvuga ko Okende yiyishe.
Stanis Bujakera ni n’umunyamakuru ukorera mu buryo budahoraho ibinyamakuru mpuzamahanga nka Jeune Afrique cyo mu Bufaransa n’ibiro ntaramakuru Reuters byo mu Bwongereza.
Itabwa muri yombi rye mu mezi atandatu ashize ryamaganwe bikomeye mu gihugu no mu mahanga, ndetse haba n’imyigaragambyo imbere y’ambasade ya DR Congo i Buruseli mu Bubiligi.
- Advertisement -
Bujakera yarezwe kwandikira Jeune Afrique inkuru ishinja ba maneko ba Congo kwica Okende, amezi arenga gato atatu mbere yuko haba amatora ya perezida yatsinzwe na Félix Tshisekedi wari usanzwe ku butegetsi.
Okende yahoze ari Minisitiri wo gutwara abantu n’ibintu, yegura mu Kuboza mu 2022.
Ubwo yapfaga, yari umudepite akaba n’umuvugizi w’ishyaka Ensemble Pour La République rya Katumbi.
Muri Nzeri mu mwaka ushize, Jeune Afrique yavuze ko ihagaze kuri iyo nkuru yatangaje ku itariki ya 31 Kanama uwo mwaka.
IVOMO:BBC
UMUSEKE.RW
