Ikipe y’Ingabo z’Igihugu, yashyikirijwe igikombe cya 22 cya shampiyona yegukanye ku manota 68 mu mikino 30 ikinwa.
Ku Cyumweru tariki ya 12 Gicurasi ni bwo ikipe ya APR FC yashyikirijwe igikombe cya 22 cya shampiyona yegukanye uyu mwaka w’imikino 2023-2024.
Iyi kipe y’Ingabo yabanje gukina umukino usoza shampiyona, igwa miswi n’Amagaju FC nyuma yo kunganya igitego 1-1.
Mbere yo gushyikirizwa Igikombe, habanje gukorwa ibikorwa bitandukanye byakozwe n’abakunzi ba APR FC, birimo gukora akarasisi mu bice bitandukanye by’Umujyi wa Kigali.
Hari umuhanzi, Chriss Easy na DJ Toxic wasusurutsaga abaje kureba umukino wa nyuma kuri Kigali Pelé Stadium.
Mbere y’uko umukino utangira, abahoze bakinira iyi kipe y’Ingabo barimo Gatete Jimmy, Sibomana Abdul, Byusa Wilson (Rudifu), Bizimana Didier, Ndizeye Aimée Désiré Ndanda, babanje guhabwa icyubahiro n’abakunzi b’iyi kipe.
Igikombe cyazanywe na Ndanda wakiniye iyi kipe nk’umunyezamu ndetse akaba ari n’umutoza w’abanyezamu ba yo ubu.
Ni ibirori kandi byitabiriwe n’abayobozi batandukanye barimo uyobora Ishyirahamwe ry’Umupira w’Amaguru mu Rwanda, Ferwafa, Munyantwari Alphonse, uyobora Inama y’Ubutegetsi ya shampiyona y’u Rwanda, Hadji Mudaheranwa Yussuf, Umuyobozi w’Icyubahiro wa APR FC akaba n’Umugaba w’Ingabo z’u Rwanda, Gen Mubarakh Muganga, Minisitiri w’Ingabo, Marizamunda Juvénal n’abandi.
Ni igikombe cya 22 cya shampiyona iyi kipe y’Ingabo yegukanye kuva yashingwa mu 1993. Ni icya Gatatu yegukanye idatsinzwe guhera mu 2021-2022, 2022-2023 na 2023-2024.
- Advertisement -
UMUSEKE.RW