Igipolisi cya Kenya cyarashe ibyuka biryani mu maso , yirukana abigarambya bari bafite uburakari bwinshi mu Murwa mukuru muri Kenya.
Muri Nairobi , amaduka menshi yafunze imiryango ubwo imyigaragambyo yabaga muri uyu mujyi ndetse na Kisumu .
Urubyiruko ruramagana itegeko ryo kongera umusoro ku bintu bitandukanye ryiswe “finance bill” kugira ngo rifashe kuzahura ubukungu bw’igihugu.
Perezidante wa Komisiyo y’Uburenganzira bwa Muntu muri Kenya, Roseline Odede aheruka gutangaza ko ari bwo bwa mbere imyigaragambyo iguyemo abantu benshi mu gihe gito muri Kenya, avuga ko bari gukurikirana ibiba kandi bazakora iperereza.
Amashyirahamwe aharanira uburenganzira bwa muntu avuga ko kuva hadutse iyi myigarambyo abashinzwe umutekano bamaze kwica abantu 39.
Muri Mombasa, hagaragaye imodoka zishya, abigaragambya nabo bahanganye bikomeye na polisi
Ikinyamakuru Daily Nation kivuga ko guhangana gukomeye kwabereye i Nairobi kwatumye abacamanza bahagarika ibikorwa byo kuburanisha mu Rukiko rumwe rwo mu murwa Mukuru.
Umuryango uharanira uburenganzira bwa muntu muri Kenya, Kenya National Commission on Human Rights (KNCHR), uvuga ko abenshi bapfuye ku wa kabiri mu gihe abanyamategeko bemezaga iri tegeko riri kwamaganwa.
Abantu 19 bishwe i Nairobi, 22 nabo bicwa mu bindi bice by’igihugu, nk’uko itangazo uno muryango wasohoye ribivuga .
- Advertisement -
Rivuga kandi ko abantu 361 bakomeretse, 32 nabo baburiwa irengero, naho 627 bakaba barahagaritswe.
Mu kiganiro n’abanyamakuru ku cyumweru, Perezida Ruto yavuze ko Polisi “Yakoze neza uko ishoboye kose”.
Yongeyeho ko “ Niba koko Polisi yarakoresheje ingufu z’umurengera mu guhosha iyi myigaragambyo, bizakurikiranwa binyuze mu nzira zisanzwe zihari.”
Abigaragambya biganjemo urubyiruko bibasiye ibikorwa bya Leta nk’Inteko ishinga amategeko barayitwika, batwika indege yari ku kibuga cy’indege iparitse, basahura amaduka ya bamwe mu Badepite, ndetse banahangana bikomeye n’abapolisi harimo no kubatera amabuye.
UMUSEKE.RW