PL yashimiye Abanyarwanda ku bwo guhundagaza amajwi kuri Kagame

MUGIRANEZA THIERRY 18/07/2024 11:37

Ishyaka Riharanira Ukwishyira Ukizana kwa buri Muntu, PL, ryashimiye Abanyarwanda bose icyizere barigiye mu matora ya Perezida wa Repubulika n’ay’Abadepite, bagatora Abadepite bayo ndetse n’Umukandinda Paul Kagame ryari rishyigikiye.

Kuva ku ya 14-16 Nyakanga 2024, mu Rwanda habaye amatora ya Perezida wa Repubulika ndetse n’ay’Abadepite, yitabiriwe n’abarenga miliyoni icyenda.

Mu by’ibanze byavuye mu matora ya Perezida wa Repubulika n’ay’Abadepite, Komisiyo y’Igihugu y’Amatora, NEC, yagaragaje ko Paul Kagame wari waratanzwe na FPR-INKOTANYI n’indi mitwe ya Politike irimo PL yagize amajwi 99.15%, arusha abo bari bahanganye barimo Dr Frank Habineza wagize 0,53% mu gihe Mpayimana Philippe yagize 0,32%.

Mu matora y’Abadepite, PL, yagize amajwi 10.97% bingana n’abarishyigigikiye bagera kuri 957,602.

Ku ya 17 Nyakanga 2024, PL, yasohoye Itangazo ishimira Abanyarwanda bose icyizere barigiriye mu matora ya Perezida wa Repubulika n’ay’Abadepite.

Riti ” Ishyaka PL rirashimira byimazeyo Abanyarwanda uburyo bahundagaje amajwi menshi cyane kuri Nyakubahwa KAGAME Paul, Umukandida ryashyigikiye ku mwanya wa Perezida wa Repubulika, ikaba ryishimiye cyane intsinzi yegukanye.”

Rigakomeza rigira riti ” Ishyaka PL rirashimira kandi Abanyarwanda batoye abakandida Depite baryo bazahagararira abanyarwanda mu Nteko Ishinga Amategeko Umutwe w’Abadepite.”

Ishyaka PL rivuga ko ryishimiye amajwi ryagize n’intsinzi ryegukanye, rikaba ryizeza Abanyarwanda kurushaho guharanira iterambere rishingiye kuri buri munyarwanda binyuze mu miyoborere myiza, ubukungu n’imibereho myiza by’abaturage kandi umuturage akagira umwanya wo gutanga ibitekerezo mu bwisanzure kuri gahunda z’Igihugu zigamije iterambere ryacyo.

Komisiyo y’Igihugu y’Amatora, NEC, yavuze ko bitarenze tariki ya 20 Nyakanga 2024, Abanyarwanda bazatangarizwa by’agateganyo ibyavuye mu matora ya Perezida wa Repubulika n’ay’Abadepite batorwa mu buryo butaziguye.