Nyuma yo gukemura ibibazo yari ifite byo kutemererwa gusinyisha abakinnyi kubera abayireze mu Ishyirahamwe mpuzamahanga ry’Umupira w’Amaguru ku Isi, FIFA, ikipe ya Kiyovu Sports yamaze kumvikana na Emmanuel Okwi wamaze kugera mu Rwanda.
Urucaca rukomeje gukora ibyarwo bucece n’ubwo rwatakaje abakinnyi bari mu beza rwagenderagaho. Kuri iyi nshuro, ibisubizo byo gusimbuza abagiye muri iyi kipe yo ku Mumena, kugira ngo izabashe kuba mu zizahangana n’izindi z’ibigugu.
Amakuru yizewe UMUSEKE wamenye, ni uko Emmanuel Okwi yamaze kugera i Kigali aho yaje kurangizanya na Kiyovu Sports ndetse agahita asinya amasezerano nyuma y’uko n’itike y’indege yamuzanye, yatanzwe na perezida w’iyi kipe, Nkurunziza David.
Okwi yaherukaga muri iyi kipe mu mwaka w’imikino 2021-2022 ubwo Urucaca rwaburaga igikombe cya shampiyona ku mukino usoza shampiyona wabereye kuri Stade Muhanga, rugatsinda Marines FC ibitego 2-1 ariko bitagize icyo bimara.
Uyu munya-Uganda ufite uburambe bwa ruhago ya Afurika, araza ahasanga Hamiss Cédric, Mbirizi Eric, Jéremie Basilua n’abandi.
UMUSEKE.RW
