Nyuma yo kwitwara neza mu kwezi k’Ukwakira utararangira, Ikipe y’Igihugu, Amavubi, yazamutseho imyanya ine ku rutonde ngarukakwezi rw’Ishyirahamwe Mpuzamahanga ry’Umupira w’Amaguru ku Isi, FIFA.
Uru rutonde ngarukakwezi rwa FIFA [FIFA Ranking], rwasohotse ku wa Kane tariki ya 24 Ukwakira 2024. Rwerekanye ko u Rwanda rwavuye ku mwanya wa 130 rugera ku mwanya w’126 ku Isi n’amanota 1130.4.
Muri uku kwezi, Amavubi yatsinzwe na Bénin ibitego 3-0 mu mukino ubanza mu gushaka itike y’Igikombe cya Afurika, atsinda uwo kwishyura ibitego 2-1 mu mukino wabereye kuri Stade Amahoro.
Ibindi bihugu byo muri aka Karere ka Afurika y’i Burasirazuba no Hagati, nka Uganda, iri ku mwanya wa 87 ivuye kuri 90. Bivuze ko yazamutseho imyanya itatu. Kenya iri kumwanya wa 106, Tanzania ni iya 112 mu gihe u Burundi ari ubwa 139. Éthiopie iri ku mwanya wa 148, Sudan y’Epfo ni iya 172 mu gihe Djibouti iri ku mwanya wa 192, Somalie ziri ku mwanya wa 202 ku Isi.
Algentine iracyayoboye uru rutonde, igakurikirwa n’u Bufaransa. Maroc ni cyo gihugu cyo ku Mugabane wa Afurika kiza hafi ku Isi [13] mu gihe Sénégal iri ku mwanya wa 20 ku Isi.
UMUSEKE.RW