Ikipe ya Gisagara Volleyball Club, yamuritse abakinnyi izakoresha mu mwaka w’imikino uri hafi gutangira, mu birori iyi kipe yanakinnyemo umukino wa gicuti na Police VC.
Ibi birori byabaye ku wa Gatandatu, tariki ya 12 Ukwakira 2024, mu nzu y’imikino (gymnase) y’Akarere ka Gisagara.
Abakinnyi 15 ni bo berekanwe n’Umuyobozi wa Gisagara VC, Tonci Tadić.
Abo ni Ngaboyintwari Cédric, Mugabo Thierry, Adamou Doudou Djibril, Mukerangabo Hahirwa Yvan, Ngoboka Blaise, Mucyo Eintore Luxin, Malinga Kathbart, Rukundo Willy, Nziriyo Mandela, Ishimwe Ernest, Allan Ejeit Olokotum, Dushimurukundo Pacifique, Ntirushwa Stiven, Isingizwe Sibo Servet na Niyonkuru Gloire wagizwe Kapiteni w’ikipe.
Herekanwe kandi Umutoza Mukuru, Yakan Guma Lawrence, Umutoza Wungirije, Ndahiro Joseph ndetse n’umuganga Mukiza Noel.
Nyuma yo kwerekana abakinnyi, hakinwe umukino wa gicuti hagati y’iyi kipe iterwa inkunga n’Akarere ka Gisagara ndetse na Police VC.
Uyu mukino wakinwe amaseti abiri yonyine, ukaba warangiye amakipe anganya iseti 1-1 (25-22 na 34-36).
Ibi birori byasojwe n’abahanzi, Ariel Wayz, Bull Dogg, Riderman ndetse n’itsinda ry’ababyinnyi ririmo Titi Brown bataramiye abari muri Gymnase ya Gisagara.
Nyuma yo kumara igihe ititwara neza, Gisagara VC ni imwe mu makipe yitezwe na benshi muri Shampiyona y’uyu mwaka, na cyane ko iherutse gusinyana amasezerano y’ubufatanye y’imyaka itatu na Sosiyete yo gutega ku mikino y’amahirwe ya Forrza Gaming Rwanda.
- Advertisement -
Amafaranga uyu mufatanyabikorwa azatanga azunganira miliyoni 150 Frw iyi kipe isanzwe igenerwa n’Akarere ka Gisagara.
Shampiyona y’Icyiciro cya Mbere muri Volleyball ya 2024/25, izatangira ku wa 18 Ukwakira 2024.
ISHIMWE YARAKOZE SETH KEFA/UMUSEKE.RW
