Abaturage bo mu karere ka Nyamasheke,Umurenge wa Kirimbi,mu Ntara y’Iburengerazuba, batunguwe n’urupfu rw’umugore witwa Nyirandaberetse Vestine, waryamye ari muzima bugacya yapfuye.
Byabaye mu ijoro ryo kuwa Gatandatu rishyira cyumweru tariki ya 7 Ukwakira 2024, mu Mudugudu wa Nyakabingo, Akagari ka Muhororo.
UMUSEKE wamenye ko uyu nyakwigendera mu ijoro ryo kuwa Gatandatu rishyira ku cyumweru, yari yiriwe mu mirimo ye ya buri munsi.
Andi makuru ava mu baturage avuga ko atari abanye neza n’umugabo we.
Umunyamabanga Nshingwabikorwa w’Umurenge wa Kirimbi ,Habimana Innocent,yahamirije UMUSEKE ko ibyo byago byabaye ndetse ko iperereza rikiri gukorwa.
Ati”Nyirandaberetse Vestine kuwa Gatandatu yari yiriwe mu kazi ke saa cyenda z’ijoro atangira kuribwa mu nda, yitaba Imana mu gitondo.”
Mu Mudugudu bavugaga ko bari babanye mu makimbirane.
Uyu munyamabanga Nshingwabikorwa yakomeje avuga ko umugabo we akiri mu rugo rwe.
Uyu muyobozi yasabye abaturage ko habaye hari ugize uburwayi agomba kwihutira kwa muganga, akanabimenyesha abaturanyi, anabasaba kubana neza mu mahoro.
- Advertisement -
Umurambo wa Nyakwigendera wajyanye mu Bitaro bya Kibogora Gukorerwa isuzuma.
MUHIRE Donatien
UMUSEKE.RW/NYAMASHEKE
