Nyuma yo kugwa miswi na APR FC bakanganya 0-0 mu mukino w’umunsi wa Munani wa shampiyona, ikipe ya Gorilla FC yamaze gushyikiriza Ishyirahamwe rya Ruhago mu Rwanda irega ikipe y’Ingabo kwica amategeko agenga amarushanwa mu rwego rushinzwe gutegura shampiyona [Rwanda Premier League].
Ku Cyumweru tarikiya 3 Ugushyingo 2024, ni bwo hasojwe imikino y’umunsi wa Munani wa shampiyona y’Icyiciro cya mbere mu Bagabo. Umukino wari uhanzwe amaso na benshi, ni uwahuje Gorilla FC na APR FC ariko warangiye nta kipe ibashije kubona izamu ry’indi.
Ubwo umukino wari ugeze ku munota wa 65, ikipe y’Ingabo yakoze impinduka, ikuramo Tuyisenge Arsène na Richmond Lamptey, basimburwa na Chidiebere na Mamadou Sy.
Kuri uyu munota, mu kibuga cya APR FC hahise hagaragaramo abakinnyi barindwi b’abanyamahanga. Aha harimo Pavelh Ndzila, Lamine Bah, Mamadou Sy, Chidiebere, Taddeo Lwanga, Victor Mbaoma na Aliou Souane. Aba bakinnyi bamaze iminota igera kuri itanu bari gukina ari barindwi.
Nyuma y’iyi minota, abari ku ntebe y’abatoza y’ikipe y’Ingabo, bahise babibona bahita bakuramo Lamine Baha wahise asimburwa na Kwitonda Alain Bacca, maze noneho hasigaramo abanyamahanga batandatu.
Gusa amakuru yizewe UMUSEKE wamenye, avuga ko ubuyobozi bwa Gorilla FC bwahise butegura ikirego buregamo ikipe y’Ingabo, ubwo umukino wari ugeze ku munota wa 75, maze bucyohereza mu Ishyirahamwe ry’Umupira w’Amaguru mu Rwanda, hifashishijwe Email. Iki kirego cyasobanuraga ibyabaye ndetse igaragaza ko ikipe bakinaga yishe Itegeko rigenga amarushanwa muri Rwanda Premier League.
Mu gihe iki kirego cyaba gihawe agaciro, habaho gusesengura neza icyo Itegeko rivuga, ubundi ikipe yakoze amakosa ikayazwa ndetse ikayahanirwa.
Abavuga ko APR FC ishobora guterwa mpaga, babishingira ko itegeko rya Rwanda Premier League rigenga amarushanwa, rivuga ko mu gihe umunyamahanga avuye mu kibuga asimburwa n’umunyamahanga mugenzi we cyangwa se akaba yanasimburwa n’Umunyarwanda ariko abanyamahanga ntibagomba kurenga batandatu mu gihe umukino uri gukinwa.
Ikipe ya APR FC yahise ijya ku mwanya wa 14 n’amanota atanu mu mikino itatu imaze gukina mu gihe Gorilla FC yafashe umwanya wa Kabiri n’amanota 15.
- Advertisement -
UMUSEKE.RW
