Ubuyobozi bwa Rayon Sports Women Football Club, bwanze kugurisha rutahizamu Mukandayisenga Jeannine uzwi ku izina rya “KaBoy”, nyuma y’uko ashimwe na Yanga Princess yo mu cyiciro cya mbere muri Tanzania.
Uyu mukobwa amaze iminsi mu gihugu cya Tanzania, aho yagiye mu igeragezwa mu kipe ya Yanga Africans Women Team [Yanga Princess]. Amakuru yizewe UMUSEKE wamenye, avuga ko uyu rutahizamu yamaze gushimwa igisigaye ari ukumvikana kw’amakipe yombi.
Ubuyobozi bwa Yanga Princess, bwabwiye ubwa Rayon Sports WFC ko bwiteguye kwishyura ibihumbi by’amadolari (3,000$) kuri uyu rutahizamu wari usigaranye amezi atanu y’amasezerano ye muri iyi kipe yo mu Nzove. Gusa iyi kipe ikunzwe na benshi mu Rwanda, yo iramwifuzamo ibihumbi 5$.
Amakuru avuga ko iyi kipe yo muri Tanzania yari yanemeye ko uyu mukinnyi agaruka mu Rwanda agakina imikino ibanza yose, ubundi agahita yerekeza mu kipe ye nshya ariko Gikundiro yakomeje kuba ibamba aho ivuga ko amafaranga imwifuzamo ari ibihumbi 5$.
Nubwo Rayon Sports WFC yifuza ibi ariko, imaze amezi atanu idahemba uyu mukinnyi, ndetse inamufitiye uduhimbazamusyi tw’imikino batsinze kuva shampiyona yatangira.
Andi makuru avuga ko mu gihe iyi kipe yakomeza kugorana kurekura uyu mukinnyi, we n’ushinzwe kumushakira akazi, biteguye kwisunga FIFA kuko hari icyo amategeko avuga ku mukozi umaze byibura amezi atatu adahembwa mu kipe ye.
KaBoy ni umwe mu bakinnyi beza muri shampiyona y’u Rwanda y’Icyiciro cya mbere mu Bagore. Kugeza ubu amaze gutsinda ibitego 13 mu mikino irindwi imaze gukinwa muri shampiyona y’uyu mwaka.
Yaje muri Rayon Sports WFC mu mwaka 2023-2024 avuye mu Inyemera WFC. Yahise afasha iyi kipe kwegukana ibikombe birimo icya shampiyona n’icy’Amahoro ndetse asoza shampiyona ari we watsinze ibitego byinshi.
UMUSEKE.RW
