Abakuru b’ibihugu bitandukanye barimo Perezida w’u Burundi, Ndayishimiye Evariste na Felix Tshisekedi wa Repubulika ya Demokarasi ya Congo, bishimiye Donald Trump watorewe kuyobora Leta zunze Ubumwe za Amerika.
ku wa kabiri tariki 5 Ugushyingo 2024, Abanyamerika biriwe mu matora yo gutora Perezida wabo wa 47.
Ni amatora yarimo abakandinda Perezida babiri barimo Kamala Harris w’ishyaka ry’Abademocarate na Donald Trump w’Aba-Repubuliani.
Amajwi amaze kubarurwa arerekana no Donald Trump wabaye Perezida wa Leta zunze Ubumwe za Amerika wa 45, yatsinze amatora ahigitse Kamala Harris wari Visi-Perezida ku butegetsi bwa Joseph Biden.
Kugeza ubu afite amajwi 277, mu gihe hari hakeneewe amajwi 270, Kamala Harris we afite 224.
Abategetsi bari kwishimira intsinzi ya Trump
Perezida Ndayishimiye w’u Burundi yanditse kuri X, ati” N’umutima wanjye nshimiye Perezida watowe Donald Trump, ku bw’intsinzi y’amateka yagize.”
General Neva yavuze ko yizeye ko umubano w’u Burundi na Leta zunze Ubumwe z’Amerika uzakomeza kwaguka.
Perezidanse ya Repubulika Iharanira Demokarsi ya Congo, yanditse kuri X ko Perezida Tshisekedi mu izina ry’abaturage ba Congo yashimiye Trump ku bw’intsinzi ye y’amateka.
- Advertisement -
Iti” Umukuru w’igihugu yiteguye gukomeza gukorana n’uwatowe mushya mu kwagura ubufatanye hagati ya RDC na Leta zunze Ubumwe z’Amerika.”
Minisitiri w’Intebe w’u Bwongereza, Keir Starmer, nawe yashimiye Donald Trump, avuga ko yizeye ko bazakomeza kunoza imikoranire mu myaka iri imbere.
Ati “Nzi ko u Bwongereza na Amerika bizakomeza kunoza imikoranire mu nzego z’iterambere, umutekano, guhanga udushya n’ikoranabuhanga.”
Chancelier w’u Budage, Olaf Scholz, nawe yashimiye Donald Trump, avuga ko ibihugu byombi bimaze igihe kirekire bikorana mu guteza imbere ubusugire n’umudendezo.
Ati “Tuzakomeza kubikora ku neza y’abaturage bacu.’
Minisitiri w’Intebe wa Ethiopia, Abiy Ahmed Ali, yagaragaje ko yanyuzwe no kuba Donald Trump yongeye gusubira ku butegetsi.
Ati “Ntegereje kubona imikoranire igamije kunoza no kwagura umubano w’ibihugu byombi muri manda yawe.’’
Perezida wa Guinée Bissau, Umaro Sissoco Embaló, yashimye Donald Trump watorewe kuyobora Leta Zunze Ubumwe za Amerika, amwifuriza guhirwa muri manda ye no kurushaho kunoza umubano uhuriweho.
Yagize ati “Turifuza ko manda ye izaba iy’amahoro n’iterambere.’’
Minisitiri w’Intebe wa Israel, Benjamin Netanyahu, yashimye Donald Trump, watangaje ko yegukanye intsinzi mu matora ya Perezida wa Leta Zunze Ubumwe za Amerika, agaragaza ko gusubira ku buyobozi kwe ari intambwe nziza ku mubano uhuriweho n’ibihugu byombi.
THIERRY MUGIRANEZA / UMUSEKE.RW
