Umuryango uhuza ibihugu bya Afurika y’Amajyepfo, SADC, wakoze inama y’igitaraganya i Dar es Salaam muri Tanzania, ihuza abakuru b’ibihugu bawugize.
Iyi nama yabaye ku munsi w’ejo kuwa kabiri tariki ya 28 Mutarama 2025,yahuje abakuru b’ibihugu batandukanye barimo Samia Suluhu Hassan wa Tanzania, na Perezida Hakainde Hichilema wa Zambia hamwe na Perezida Lazarus Chakwera wa Malawi .
Icyakora Perezida Cyril Ramaphosa wa Afrika y’Epfo na Felix Tshisekedi bitabiriye iyi nama bifashishije ikoranabuhanga.
Itangazo ryasohowe n’ibiro by’umukuru w’igihugu cya Tanzania ntirivuga ibyagarutsweho muri iyi nama, icyakora mbere y’iyo nama byavugwaga ko yiga ku bibazo by’umutekano mucye muri Congo aho uyu muryango woherejeyo ingabo.
Umuryango wa SADC wohereje ingabo muri Repubulika Iharanira Demokarasi ya Congo nyuma yo kubona umutwe wa M23 uri gukubita inshuro ingabo za leta FARDC.
Ingabo zahawe izina rya SAMIDRC zirimo iza Africa y’Epfo, Tanzania, na Malawi zigiye kumara umwaka mu burasirazuba bwa Congo kuko zihari kuva mu Ukuboza 2023.
Mu byazijyanye harimo kurwanya umutwe wa AFC/M23, aho zifatanya n’ingabo za Leta ya Congo, Wazalendo, ingabo z’Uburundi n’indi mitwe ishyigikiye leta ya Congo.
Gusa kugeza ubu ntabwo byabujije M23 gufata ibice bitandukanye muri Masisi, Rutshuru na Lubero, Goma, Minova ndetse no muri Walikale.
Hari amashusho aheruka gusaka ku mbuga nkoranyambaga agaragaza umwe mu ngabo za Afurika y’Epfo, amanika igitambaro cy’Umweru, asaba uyu mutwe wa M23 ko wabaha agahenge mu mirwano bahanganyemo.
- Advertisement -
Ibi byafashwe nko gustindwa kw’uyu muryango wa SADC ndetse byatumye Afurika y’Epfo isohora itangazo igitaraganya isobanura kuri icyo gikorwa “ Cyafashwe nk’ubugwari bw’uyu muryango.”
Uyu muryango umaze gupfusha abasirikare barenga 10 muri iyi mirwano FARDC n’indi mitwe bafatanya igihanganyemo na AFC/M23.
UMUSEKE.RW
