Umunyamabanga Mukuru w’Ishyaka rya CNDD-FDD riri ku butegetsi mu Burundi, Bwana Révérien Ndikuriyo, ubuzima bwe bumeze nabi aho arwariye mu Bitaro byo muri Kenya ndetse ari muri Coma.
Reverien Ndikuriyo amakuru avuga ko arembeye mu Bitaro bya Kaminuza ya Aghakan muri Kenya .
Umwe mu bantu ba hafi y’Umuryango we, babwiye ikinyamakuru SOS Media Burundi, kitavuga rumwe n’ubutegetsi buriho, ko “ Ubuzima bwe bumeze nabi cyane . Ngo yari yavuye muri Coma ku cyumweru gishize, ayisubiramo.”
SOS Media burundi ivuga ko Abarundi bari muri Kenya bangiwe gusura icyumba uyu mutegetsi arwariyemo nubwo mbere bari bemerewe kumusura.
Umwe mu nshuti za hafi y’umuryango we yagize ati “ Dutereje icyo Imana izakora, ubu turahangayitse.”
Abagize CNDD-FDD banenga kuba batabwirwa amakuru y’uburwayi bwa Ndikuriyo ndetse ko buteye urujijo.
Kugeza ubu haribazwa icyatumye uyu mutegetsi mu ishayaka riri ku butegetsi aremba bikagirwa ubwiru mu barwanashyaka.
Amakuru UMUSEKE utabashije kugenzura avuga ko ngo mu modoka ya Ndikuriyo hashyizwemo uburozi bw’ifu n’abantu bashatse kumwivugana ubwo yari yitabiriye ibikorwa by’Ishyaka i Ngozi .
Ni mu gihe umwe mu barinzi be yashizemo umwuka ku wa Gatanu, nk’uko bivugwa na SOS Media .
- Advertisement -
Kugeza ubu, umushoferi hamwe n’umupolisi bari bicaye ku ntebe z’imbere mu modoka barafunzwe.
Hari n’abahuza ko uyu Ndikuriyo yaba ashaka kwikizwa n’abo bari kumwe mu ishyaka yitambikaga inyungu zabo.
UMUSEKE.RW