Umunyamabanga Nshigwabikorwa w’umurenge wa Manihira, mu karere ka Rutsiro, Basabose Alexis ndetse n’ushizwe Iterambere ry’Ubucuruzi n’Umurimo mri uwo Murenge witwa Hategekimana Victor, batawe muri yombi, bakurikiranyweho ibyaha byo gukoresha ububasha bahabwa n’itegeko mu nyungu bwite no gukoresha inyandiko mpimbano.
Ibi byabereye mu Karere ka Rustiro, Umurenge wa Manihira, Akagari ka Haniro mu Mudugudu wa Gitwe.
Urwego rw’Igihugu rw’Ubugenzacyaha, RIB,ruvuga ko rwabataye muri yombi ku wa 07 Mutarama 2025.
Aba bombi bakoze ibi byaha mu bihe bitandukanye kuva mu 2022 ubwo bakoreshaga inyandiko mpimbano bagakora itsinda rya baringa baryita Twiyubake, bakaryandikaho abantu batandukanye mu bihe binyuranye, kugira ngo babone uko bajya kwaka inguzanyo muri gahunda ya VUP.
Batse inguzanyo ya miliyoni enye z’amafaranga y’u Rwanda mu bihe bitandukanye, babeshyako bafite imishinga bagiye gukora kandi ari ibinyoma.
Ubu, abakekwa bafungiye kuri Sitasiyo ya RIB ya Gihango n’iya Rusebeya mu Karere ka Rutsiro, mu gihe dosiye yabo iri gutunganwa kugira ngo yohererezwe ubushinjacyaha.
Icyaha bakurikiranywe cyo gukoresha ububasha uhabwa n’itegeko mu nyungu bwite, giteganywa n’ingingo ya 15 y’itegeko N°54/2018 ryo ku wa 13/08/2018 ryerekeye kurwanya ruswa.
Iyo uregwa ahamijwe iki cyaha, ahanishwa igifungo kuva ku myaka irindwi ariko kitarenze imyaka 10, n’ihazabu kuva kuri miliyoni eshanu Frw ariko atarenze miliyoni 10 Frw.
Guhimba, guhindura inyandiko cyangwa gukoresha inyandiko mpimbano, na cyo ni icyaha giteganwa n’ingingo ya 276 y’Itegeko No 68/2018 ryo ku wa 30/08/2018 riteganya ibyaha n’ibihano muri rusange.
- Advertisement -
Iyo uregwa ahamijwe icyaha, ahanishwa igifungo kuva ku myaka itanu ariko kitarenze imyaka irindwi, n’ihazabu guhera kuri miliyoni eshatu z’amafaranga y’u Rwanda, ariko atarenga miliyoni eshanu Frw, cyangwa kimwe gusa muri ibyo bihano.
UMUSEKE.RW