Umuvugizi wa Perezida Felix Antoine Tshisekedi, Tina Salama, yatangaje ko atazitabira inama idasanzwe y’Abakuru b’ibihugu b’umuryango wa Afurika y’Iburasirazuba yigaga ku bibazo by’Umutekano mucye muri Congo.
Perezida wa Kenya, William Ruto, akaba n’umuyobozi wa EAC,yari yatangaje ko mu gihe cy’amasaha 48 ateganya inama ihuza abakuru b’ibihugu bo mu muryango wa Afurika y’Iburasirazuba.
Umuvugizi wa Perezida, Tina Salama, yabwiye Jeune Afrique ko Perezida atazitabira iyi nama ahanini bitewe nuko ibintu bimeze.
Ati “ Birasobanutse, bitewe n’amakuru yuko ibintu byifashe ubu, Perezida ntazajya muri iyo nama.”
Tina salama ku rubuga rwa X rwahoze ari twitter , yatangaje ko Perezida Felix Tshisekedi kuri uyu wa mbere yahamagaje abagaraririye inzego zitandukanye muri Congo, inama yabereye ku cyicaro cy’Umuryango wa Afurika Yunze Ubumwe.
William Ruto ku munsi wejo yatangaje ko intambara iri mu Burasirazuba bwa Congo ihungangabanya bikomeye uburenganzira bwa muntu .
Ati “Ikibazo cy’umutekano mucye kiri mu Burasirazuba bwa Congo, gihangayikishije abaturage bagize Umuryango wa Afurika y’Iburasirazuna. Ibibazo bijyanye n’imibereho y’ikiremwamuntu biri kurushaho kuba bibi kubera ibikorwa bya gisirikare birimo no gufunga ikirere cya Goma.”
Ruto avuga ko hakwiye kubahirizwa ibikubiye mu masezerano ya Luanda, impande zihanganye zikajya mu biganiro.
Umuvugizi wa Leta ya Congo, Patrick Muyaya, yatangaje abaturage basabwa kuguma mu rugo birinda ko bakorwaho n’imirwano.
- Advertisement -
Kugeza ubu imirwano irakomeje mu Mujyi wa Goma ndetse umutwe wa M23 uhanganye n’ingabo za leta wafashe uyu mujyi , Radio na Televiziyo ya Congo iri muri Goma.
Ni mu gihe abarwanyi ba FARDC bamwe batangiye guhungira mu Rwanda.
UMUSEKE.RW