U Rwanda na Guinea- Conakry, kuri uyu wa mbere tariki ya 27 Mutarama 2025,basinyanye amasezrano y’ubufatanye mu by’umutekano.
Ni amasezerano yashyiriweho umukono I Kigali, aho yari ahagarariwe na Minisitiri w’Umutekano imbere mu gihugu, Dr Vincent Biruta ndetse na mugenzi we wa Guinea ushinzwe umutekano no kurinda abaturage mu bihugu byo mu Burengerazuba bwa Afurika, General (Rtd) Bachir Diallo.
Intego y’aya masezerano ni ugukomeza ubufatanye hagati y’ibihugu byombi mu bijyanye no gucungira umutekano abaturage, hatangwa amahugurwa , gusangizanya ubumenyei ndetse n’imyitozo , ubufasha mu bya tekiniki , guhanahana amakuru ndetse no mu bijyanye n’ubutasi.
Aya masezerano yashinywe ku mpande zombi azatuma kandi habaho ubufatanye mu kurwanya ikoreshwa ry’ibiyobyabwenge, iperereza ku byaha no kurwanya ibyaha bikorerwa ku ikoranabuhanga.
Usibye ibyo kandi aya masezerano azatuma impande zombi zifatanya mu kurebera hamwe uko harwanywa Ibiza n’ingaruka zatezwa na byo, umutekano wo mu muhanda n’ibindi bitandukanye.
U Rwanda na Guinea Conakry ni ibihugu bisanzwe bifitanye umubano ndetse n’imikoranire mu ngeri zitandukanye.
Mu Kwakira umwaka ushize ibihugu byombi byasinye amasezerano 12 mu nzego zinyuranye zirimo ubukerarugendo, ubuhinzi, ingufu, guteza imbere ibyoherezwa mu mahanga, ubukungu, umutekano, ubucukuzi bw’amabuye y’agaciro n’umuco guteza imbere ibyanya byahariwe inganda n’ibindi.
Nyuma yo gushyira umukono ku masezerano Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe yavuze ko ubufatanye hagati y’ibihugu byombi bushingiye ku kuzuzanya n’ubwubahane bubyara inyungu hagati y’impande zombi.
UMUSEKE.RW