Ikipe ya APR BBC na REG WBBC, ni zo zegukanye igikombe cy’irushanwa ryo Kwibuka ku nshuro ya 31 Jenoside yakorewe Abatutsi muri Mata 1994.
Irushanwa rya Basketball ryo Kwibuka ku nshuro ya 31 Jenoside yakorewe Abatutsi muri Mata 1994, ryasojwe ku Cyumweru tariki ya 27 Mata 2025.
APR BBC yari yegukanye iri rushanwa mu mwaka ushize mu Bagabo, yongeye kuryegukana nyuma yo gutsinda UGB BBC amanota 94-92. Chasson Randile w’ikipe y’Ingabo, yayitsindiye amanota 17, atanga imipira itatu yavuyemo amanota.
Mu Cyiciro cy’Abagore, REG WBBC ni yo yegukanye igikombe nyuma yo gutsinda JKL Dolphins yo muri Uganda amanota 65-61. Umunezero Ramla wa REG WBBC, yayitsindiye amanota 16, atanga imipira itatu yavuyemo amanota ndetse akora rebounds eshanu.
DAR City BBC ya Tanzania, ni yo yabaye iya Gatatu mu Bagabo nyuma yo gutsinda KPA yo muri Kenya amanota 68-65.
Mu Bagore, KPA yo muri Kenya, ni yo yabaye iya Gatatu nyuma yo gutsinda APR WBBC amanota 72-58.
Kadidia Maiga ukinira REG WBBC, ni we wabaye umukinnyi mwiza w’irushanwa mu Cyiciro cy’Abagore.
Chasson Randle ukinira APR BBC, ni we wabaye umukinnyi mwiza w’irushanwa mu Cyiciro cy’Abagabo.
UMUSEKE.RW
