Lt.Gen Ahmed Fathi IBRAHIM KHALIFA, Umugaba Mukuru w’ingabo za Misiri ari mu ruzinduko rw’iminsi itatu mu Rwanda.
Uyu muyobozi mukuru w’ingabo za Misiri yageze i Kigali kuri iki cyumweru nk’uko byatangajwe n’igisirikare cy’u Rwanda.
Lt.Gen Ahmed Fathi yasuye icyicaro gikuru cy’ingabo z’u Rwanda, aho yakiriwe n’Umugaba Mukuru w’ingabo z’u Rwanda, Gen Mubarakh Muganga.
Igisirikare cy’u Rwanda kivuga ko kirimo kubaka ubufatanye hagati yacyo n’igisirikare cya Misiri mu bijyanye n’imyitozo, ubufatanye mu buvuzi n’ibindi ari na yo mpamvu y’uru ruzinduko rw’Umugaba Mukuru w’ingabo za Misiri.
Abagaba bakuru b’ingabo baganiriye ku bijyanye n’ubufatanye bwa gisirikare, kongera imikoranire no kureba ahandi hakenewe ko ingabo z’ibihugu byombi zifatanya.
Hanasinywe amasezerano y’ubufatanye hagati y’abayoboye ingabo z’ibihugu bya Misiri n’u Rwanda mu rwego rwo kugaragaza ko ingabo zombi zishaka ubufatanye burambye.
Lt.Gen Ahmed Fathi yanasuye urwibutso rwa Jenoside rwa Gisozi mu rwego rwo guha agaciro inzirakarengane zishwe muri Jenoside yakorewe Abatutsi mu 1994.
UMUSEKE.RW
