Ukeneye kwamamaza! Gusobanuza! Gutanga amakuru? Hamagara 0788772818
Tanzania yahawe doze zirenga miliyoni z’urukingo rwa Johnson&Johnson mu mugambi wa Covax w’ishyirahamwe ryita ku buzima kw’isi OMS/WHO wo kurwanya icyorezo cya Covid-19 cyugarije isi.
Ni mu mugambi wa Leta Zunze Ubumwe za Amerika wo gufasha umugabane wa Afurika kubona inkingo zigera kuri Miriyoni 25.
Nk’uko bimeze mu bindi bihugu, abazahabwa ubwa mbere izi nkingo ni abakora mu rwego rw’ubuvuzi ndetse n’abandi bose biboneka ko bashobora kwanduzwa icyo cyorezo.
Ambassade ya Amerika muri Tanzania mu butumwa yanyujije kuri Twitter yavuze ko bahaye izi nkingo Tanzania mu mugambi wa Covax, bakoranye n’ishyirahamwe ry’Ubumwe bwa Afurika.
Ambasaderi wa Amerika muri Tanzania, Donald J Wright yavuze ko bari kugeza inikingo muri Tanzania kugira ngo barokore ubuzima bw’abaturage mu gufata iya mbere mu rugamba rwo guhashya Covid-19.
Minisiteri y’Ubuzima muri Tanzania yatangaje ko Leta yiteguye kubona ubwoko bune bw’inkingo mu gihe cy’amezi atatu kugera kuri ane ari imbere.
Minisitiri w’Ubuzima wa Tanzania, Dr Dorothy Gwajina yabwiye itangazamakuru ko Leta iteganya gukingira 60% by’abanyatanzania.
Uru rukingo rwa Johnson&Johnson ruzatangwa kuri doze imwe gusa ku buntu mu bitaro byose bya Leta.
- Advertisement -
Abazaba bafite ingendo mu mahanga bazahabwa uru rukingo ariko babanje kurwishyura.
Hashize icyumweru mu birwa bya Zanzibar batangiye gutanga urukingo rwa Sinovac rukorerwa mu Bushinwa.
Kugeza ubu nta mibare yabamaze gukingirwa muri Zanzibar iratangazwa cyangwa umubare w’inkingo zatanzwe na Leta y’Ubushinwa.
Tanzania iherutse gutangaza ko ihanganye n’icyorezo cya Covid-19 ni mu gihe uwari Perezida John Pombe Magufuli atakozwaga ibya Covid-19.
Kuva yajya ku butegetsi Mama Samia Suluhu Hassan yahise ashyiraho itsinda rishinzwe gukurikirana uko Covid-19 ihagaze ku butaka bwa Tanzania ndetse no kugira inama Leta kugira ngo ihangane n’iki cyorezo cyugarije isi muri rusange.
Ivomo: The Citizen
NDEKEZI JOHNSON /UMUSEKE.RW
