Umunyamakuru Célestin Ntawuyirushamaboko wakoreraga BTN TV yitabye Imana azize uburywayi.
Célestin Ntawuyirushamaboko wari urambye mu mwuga w’itangazamakuru mu gisata cyo gutara no gutangaza amakuru, yitabye Imana mu ijoro ryo kuri uyu wa 14 Mata 2022.
Yari amaze iminsi yivuriza mu Bitaro bya Kibagabaga mu Mujyi wa Kigali.
Célestin Ntawuyirushamaboko yakoreye ibitangazamakuru bitandukanye birimo City Radio, Radio1 na TV1 ndetse na BTN TV yakoragaho.
Ni umwe mu banyamakuru bazibukirwa ku nkuru z’ubuvugizi hirya no hino mu gihugu.
Inkuru za Ntawuyirushamaboko zibandaga ku baturage bo hasi bakorerwa ihohoterwa ritandukanye.
Mu mwaka wa 2020 uyu mugabo yashinze ikipe y’umupira w’amaguru yitwa Intwari Fc yari igamije kumufasha mu bukangurambaga bwo kurwanya ihohoterwa rikorerwa abangavu.
Ku mbuga nkoranymbaga abantu bari guhererekanya amafoto aherekejwe n’ubutumwa bugaragaza ko bashenguwe n’urupfu rwe.
NDEKEZI JOHNSON / UMUSEKE.RW
