Perezida wa Santrafurika, Prof Faustin Archange Touadéra yakiriye mu biro bye Ambasaderi Valentine Rugwabiza, intumwa yihariye y’Umunyamabanga Mukuru w’Umuryango w’Abibumbye,António Guterres, akaba n’Umuyobozi w’Ubutumwa bw’Umuryango w’Abibumbye bugamije kugarura amahoro muri Santrafurika (MINUSCA).
Ambasaderi Valentine Rugwabiza, yakiriwe n’Umukuru w’igihugu cya Santrafurika ku gicamunsi cyo kuri uyu wa Kabiri tariki ya 19 Mata 2022.
Muri Gashyantare 2022, ni bwo Guterres yagize Amb. Rugwabiza umuyobozi wa MINUSCA asimbura Mankeur Ndiaye, warangije manda ye tariki ya 28 Gashyantare 2022.
Kuwa 18 Mata 2022, ni bwo Ambasaderi Valentine Rugwabiza yakiriwe mu buryo bw’icyubahiro n’Ingabo ziri mu butumwa bwo kugarura amahoro muri Santrafurika, MINUSCA.
Ambasaderi Rugwabiza kuva yagera muri Santrafurika kuwa 17 Mata 2022 nibwo yari abonanye na Perezida w’iki gihugu aho bagiranye ibiganiro mu muhezo.
Kuri uyu wa 19 Mata 2022, Ambasaderi Rugwabiza yanagiranye ibiganiro na Amb. Bertino Matias Matondo uhagarariye Umuryango w’Ubumwe bw’Afurika muri Sentrafurika, by’ibanze ku gutsimbataza amahoro muri kiriya gihugu.
Kuri uyu wa Gatatu tariki ya 20 Mata 2022, Ambasaderi Rugwabiza yatangaje ko bazakoresha “uburyo bwose buhabwa MINUSCA kugira ngo bagarure umutekano muri Repubulika ya Santrafurika.”
U Rwanda rufite Ingabo 1660 n’Abapolisi 459 muri ubu butumwa bwa Loni kuva rwabujyamo bwa mbere mu 2014. Ingabo zarwo nizo zirinda Perezida wa Centrafrique kuva mu 2015.
Guhera muri Kamena 2021, uhagarariye Abapolisi bari muri ubu butumwa ni CP Christophe Bizimungu wahoze ari Umuyobozi w’Ishuri Rikuru rya Polisi riherereye i Musanze.
- Advertisement -
Yasimbuye ku mwanya w’Umuyobozi w’Abapolisi bari muri Minusca, Umufaransa Pascal Champion.
Mu buyobozi bwa Minusca harimo undi munyarwanda witwa Vedaste Kalima, ufite inshingano z’ubuhuzabikorwa muri gahunda z’ubutabazi.
Ambasaderi Valentine Rugwabiza yari Ambasaderi w’u Rwanda muri Loni kuva mu 2016 aho yavuye aza gufata inshingano yahawe na António Guterres.
NDEKEZI JOHNSON / UMUSEKE.RW
